ឯកឧត្តម ស៊ុន ចាន់ថុល ជួបពិភាក្សាការងារ និងជម្រាបលាប្រធានតំណាង JICA និងជំនួបសម្តែងការគួរសម ប្រធានតំណាង JICA ថ្មី
ភ្នំពេញ៖ កាលពីថ្ងៃទី២៤ ខែវិច្ឆិកា ឆ្នាំ២០២០ នៅទីស្តីការក្រសួងសាធារណការ និងដឹកជញ្ជូន ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការនិងដឹកជញ្ជូនបានទទួលជួបពិភាក្សាការងារ និងជម្រាបលា ពីលោក Sugano Yuichi អតីតប្រធានតំណាងទីភា្នក់ងារសហប្រតិបត្តិការអន្តរជាតិរបស់ជប៉ុន (JICA) និងជំនួបសម្តែងការគួរសមពីលោកស្រី Kamei Haruko ប្រធានតំណាង JICA ថ្មី ដែលទើបនឹងទទួលការតែងតាំង អមដោយជំនាញការទទួលបន្ទុកគោលនយោបាយដឹកជញ្ជូន និងភស្តុភារកម្ម។
ឯកឧត្តមទេសរដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះជប៉ុន តាមរយៈJICA ដែលបានផ្តល់នូវជំនួយយ៉ាងច្រើនសន្ធឹកសន្ធាប់ដល់កម្ពុជា ជាពិសេសក្នុងការអភិវឌ្ឍហេដ្ឋារចនាសម្ព័ន្ធ។ ឆ្លៀតក្នុងឱកាសនោះដែរ ឯកឧត្តមទេសរដ្ឋមន្ត្រីបានកោតសរសើរចំពោះតួនាទីដ៏សំខាន់របស់ លោក Sugano Yuichi ក្នុងការណែនាំឱ្យទទួលស្គាល់ និងស្វែងរកការគាំទ្រពីជប៉ុនក្នុងការផ្តល់នូវហិរញ្ញប្បទានដល់គម្រោងហេដ្ឋារចនាសម្ព័ន្ធនៅ កម្ពុជា។ ជាក់ស្តែង ឯកឧត្តមទេសរដ្ឋមន្ត្រី បានសម្តែងនូវការពេញចិត្ត និងថ្លែងអំណរគុណដល់ជប៉ុន ដែលផ្តល់នូវគ្រឿងចក្រសម្រាប់សាងសង់ផ្លូវដល់ក្រសួង ចំពេលដែលក្រសួងត្រូវការជាចាំបាច់ក្នុងការបញ្ជូនទៅសម្រាប់ការសាងសង់ផ្លូវទាំង៣៨ខ្សែនៅសៀមរាប។
ជាការឆ្លើយតប លោក Sugano Yuichi ក៏បានថ្លែងអំណរគុណដល់ក្រសួងចំពោះកិច្ចសហការយ៉ាងពេញទំហឹងកន្លងមក និងបានណែនាំឱ្យទទួលស្គាល់ លោកស្រី Kamei Haruko ប្រធានតំណាង JICA លោក Sasaki Jun ទីប្រឹក្សាគោលនយោបាយដឹកជញ្ជូន និងលោក Kobayashi Kenichi ប្រធានទីប្រឹក្សានៃគម្រោងធ្វើឱ្យប្រសើរឡើងប្រព័ន្ធភស្តុភារកម្ម ដែលទើបទទួលការតែងតាំងថ្មី និងកាន់ការងារនៅកម្ពុជា។
នៅក្នុងជំនួបនេះដែរ ឯកឧត្តមទេសរដ្ឋមន្ត្រីបានជម្រាបជូនអំពីគម្រោងហេដ្ឋារចនាសម្ព័ន្ធសំខាន់ៗហិរញ្ញប្បទានដោយJICA រួមមាន ការសាងសង់ផ្លូវជាតិលេខ៥ ដែលជាឆ្អឹងខ្នងរបស់ប្រទេស ក្នុងការតភ្ជាប់ជាមួយបណ្តាប្រទេសដទៃទៀតក្នុងតំបន់ រួមមាន ថៃ វៀតណាម និងមីយ៉ាន់ម៉ា និងស្ពានត្សឹបាសា(ស្ពានអ្នកលឿង)នៅផ្លូវជាតិលេខ១ដែលផ្នែកមួយនៃផ្លូវល្បឿនលឿនរបស់អាស៊ាន（AH1）។
ទន្ទឹមនឹងនោះ ឯកឧត្តមទេសរដ្ឋមន្ត្រី ក៏បានជម្រាបជូនថា ទីតាំងថ្មីរបស់ក្រសួងបានរៀបចំជិតរួចរាល់ហើយ រួមមាន អាគារធំ និងវិទ្យាស្ថានជាតិបណ្តុះបណ្តាលបច្ចេកទេសសាធារណការនិងដឹកជញ្ជូន និងស្នើសុំឱ្យ JICA ជួយក្នុងការកសាងសមត្ថភាពមន្ត្រីក្រសួង ដោយផ្តល់នូវវគ្គបណ្តុះបណ្តាលរយៈពេលខ្លី មួយឬពីរសប្តាហ៍។ ឯកឧត្តមទេសរដ្ឋមន្ត្រី ក៏បានលើកឡើងអំពីការផ្តល់ជូននូវឧបករណ៍និងគ្រឿងចក្រសម្រាប់សាងសង់ ដែលមានទឹកប្រាក់សរុប៨លានដុល្លារ អាមេរិក ដល់មន្ទីរសាធារណការ និងដឹកជញ្ជូននៅទូទាំងប្រទេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។