ស្ត្រីថៃម្នាក់ ផ្ទុកកូវីដ១៩ បានចូលខារ៉ាអូខេ ផ្សារទំនើប ដោយមានមនុស្ស ៣២៦នាក់ជួបប្រាស្រ័យ
ថៃ៖ ថ្មីៗនេះ អាជ្ញាធរថៃបានបានអះអាងថា មានមនុស្ស៣២៦នាក់មានការប្រាស្រ័យទាក់ទងជាមួយស្ត្រីជនជាតិថៃម្នាក់ នៅឈឿងម៉ៃ ដែលទើបរកឃើញថាផ្ទុកជំងឺកូវីដ១៩ ហើយស្ត្រីរូបនោះបានទៅហាងខារ៉ាអូខេ ផ្សារទំនើប និងរោងភាពយន្ត ហើយបានប្រើប្រាស់សេវាកម្មដឹកជញ្ជូនទាំងឯកជនទាំងសាធារណៈទៀតផង។
បើតាមប្រភពពីផ្សារទំនើប អ្នកប្រាស្រ័យទាក់ទងទាំងនោះបានជួបស្ត្រីរូបនេះ ខណៈដែលគាត់មានវត្តមានក្នុងផ្សារទំនើប ហើយត្រូវបញ្ជូនទៅធ្វើចត្តាឡីស័ក ១៤ថ្ងៃ។ ស្ត្រីវ័យ២៩ឆ្នាំរូបនេះទើបត្រលប់មកពីប្រទេសមីយ៉ាន់ម៉ា ហើយទើបរកឃើញថាមានផ្ទុកកូវីដ១៩ កាលពីថ្ងៃទី២៧ វិច្ឆិកា ហើយអាជ្ញាធរប្រកាសនៅថ្ងៃទី២៨ តែគាត់មកដល់ប្រទេសថៃ កាលពីថ្ងៃទី២៤ តាមរថយន្ត។ អាជ្ញាធរជឿជាក់ថា ស្ត្រីរូបនេះបានឆ្លងកូវីដ១៩ ខណៈមានវត្តមាននៅប្រទេសមីយ៉ាន់ម៉ា។
ប្រភពបន្តថា ក្នុងចំណោមមនុស្សទាំង៣២៦នាក់ មាន១៤៩នាក់មានហានិភ័យខ្ពស់ ខណៈដែល១៤៩នាក់មានហានិភ័យតិច ប៉ុន្តែមានមនុស្ស៧២នាក់ ប៉ះផ្ទាល់ជាមួយស្ត្រីរូបនេះ។ មានសំណួរជាច្រើនបានសាកសួរហេតុអ្វីបានជាស្ត្រីរូបនេះចូលប្រទេស តែមិនធ្វើចត្តាឡីស័ក ប៉ុន្តែអាជ្ញាធរសុខាភិបាលថៃសង្ស័យថា ស្ត្រីរូបនេះប្រហែលចូលប្រទេសវិញ ដោយខុសច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។