ព្រឹត្តិការណ៍ពិភពលោក ឆ្នាំ២០២០ ដែលចាប់អារម្មណ៍បំផុត
នៅសល់តែពីរថ្ងៃទៀតឆ្នាំ២០២០ ដែលជាឆ្នាំ អាចនិយាយបានថាអាក្រក់បំផុតដល់មនុស្សជាតិ ទាំងការរស់នៅនិងសេដ្ឋកិច្ច ដោយសារតែ ការឆ្លងររាលដាលកូវីដ១៩ ។ ឆ្នាំ២០២១ ពលរដ្ឋនៅជុំវិញពិភពលោក បានបង្ហាញក្តីសង្ឃឹមថានឹងល្អប្រសើរឡើង ហើយការឆ្លងកូវីដ១៩ និងត្រូវបញ្ចប់ ខណៈប្រទេសជាច្រើន បានចាក់វ៉ាក់សាំងការពាររួចរាល់។
ក្នុងចំណោមព្រិត្តិការណ៍ដែលចាប់អារម្មណ៍ជាងគេ នោះគឺ ការឆ្លងកូវីដ១៩ ។ បច្ចុប្បន្នពិភពលោកមានករណីឆ្លង កូវីដ១៩ ជាង៨១,៦លានានក់ និងស្លាប់ជាង១,៧លាននាក់។
– មេបញ្ជាការកងទ័ពអុីរ៉ង់ លោកQasem Soleimani រងការធ្វើឃាតដោយយន្តហោះគ្មានមនុស្សបើករបស់អាមេរិក ក្នុងប្រទេសអុីរ៉ាក់ នាថ្ងៃទី៣ខែមករាឆ្នាំ២០២០។
-អង់គ្លេសក្លាយជាប្រទេសទីមួយចាកចេញពីសហគមន៍អឺរ៉ុបនៅថ្ងៃទី ៣១ខែមករា ឆ្នាំ២០២០ បន្ទាប់ពីការបោះឆ្នោតប្រជាមតិកាលពីឆ្នាំ២០១៦។
-អាមេរិកនិងតាលីបង់ ចុះកិច្ចព្រមព្រៀងជាប្រវត្តិសាស្ត្រនៅទីក្រុង Dohaប្រទេសកាតារ នាថ្ងៃទី២៩ខែធ្នូឆ្នាំ២០២០ ហើយតាមកិច្ចព្រមព្រៀងនោះ កម្លាំងទាហានបរទេសនឹងចាកចេញពីអាហ្វហ្គានីស្ថាននៅខែឧសភាឆ្នាំ២០២១។
-បាតុកម្មជាតិសាសន៍ក្លាយជាអំពើហិង្សា ក្រោយជនជាតិស្បែកខ្មៅ George Floyd អាយុ៤៦ឆ្នាំ ត្រូវប៉ូលិសអាមេរិកយកជង្គង់សង្កត់ករហូតដល់ស្លាប់នៅថ្ងៃទី២៥ខែឧសភា ក្នុងទីក្រុងMinneapolis ។ តាំងពីពេលនោះមកមានបាតុកម្មប្រឆាំងការរើសអើងជាតិសាសន៍កើតឡើងនៅប្រទេសជាច្រើនជុំវិញពិភពលោក។
-ការផ្ទុះ នៅថ្ងៃទី៤ខែសីហា បំផ្លាញកំពង់ផែក្នុងទីក្រុង បៃរូត(Beirut) ប្រទេសលីបង់ សម្លាប់មនុស្សជាង ២០០នាក់ និងរបួសជាង ៦៥០០នាក់។
-អ៊ីស្រាអែល បង្កើតទំនាក់ទំនង ការទូតជាមួយបណ្តាប្រទេស អារ៉ាប់ ដូចជាអារ៉ាប់រួម បារ៉ែន ស៊ូដង់ ម៉ារ៉ុក និងអារ៉ាប៊ីសាអ៊ូឌីតផងដែរ។
-បោះឆ្នោតប្រធានាធិបតីអាមេរិកដែលមានពលរដ្ឋចូលរួមបោះឆ្នោតដល់ទៅ១៦០លាននាក់ ដោយបេក្ខភាពលោកបៃឌិនទទួលបានសន្លឹកឆ្នោតគាំទ្រជាង៨១លានសន្លឹក មានកៅអីតំណាង៣០៦ ក្លាយជាប្រធានាធិបតីទី៤៦របស់អាមេរិក។ ជាមួយគ្នានោះលោកស្រី កាម៉ាឡា ហារីសក្លាយជាអនុប្រធានាធិបតីស្ត្រីដើមកំណើតអាស៊ីជាលើកដំបូងក្នុងប្រវត្តិសាស្ត្រ២០០ឆ្នាំ នៃរបបប្រជាធិបតេយ្យនៅអាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។