អាជ្ញាធរជាតិអប្សរា បញ្ចប់ជួសជុលផ្លូវដីថ្មើរជើង សម្រាប់ដើរទស្សនាធម្មជាតិជុំវិញប្រាសាទបន្ទាយស្រី
ខេត្តសៀមរាប៖ បន្ទាប់ពីការទស្សនាប្រាសាទបន្ទាយស្រី ភ្ញៀវទេសចរជាតិ និងអន្តរជាតិត្រូវបានលើកទឹកចិត្ត ឱ្យបន្តការដើរទស្សនាធម្មជាតិ ព្រៃព្រឹក្សា ព្រមទាំងសត្វស្លាប ដែលមានវត្តមាននៅជុំវិញបរិវេណប្រាសាទបន្ទាយស្រី ដោយប្រើប្រាស់ផ្លូវដីដែលអាជ្ញាធរអប្សរា បានរៀបចំតាំងពីឆ្នាំ២០០៨ សម្រាប់តែអ្នកថ្មើរជើងប៉ុណ្ណោះ។
ផ្លូវថ្មើជើងនេះ ទទួលបន្ទុកជួសជុលដោយនាយកដ្ឋានអភិវឌ្ឍន៍វប្បធម៌ សារមន្ទីរ និងបទដ្ឋានបេតិកភណ្ឌ ក្នុងន័យរក្សាឱ្យបាននូវសុវត្ថិភាពដល់ភ្ញៀវទេសចរ និង ចូលរួមគ្រប់គ្រងលំហូរភ្ញៀវផងដែរ។ ផ្លូវដីថ្មើរជើងនេះ ត្រូវបានជួសជុលកែលម្អឡើងវិញដោយចាក់បំពេញដី និងកិនបង្ហាប់នៅតាមទីតាំងហូរច្រោះ ព្រមទាំងដាំស្មៅនៅតាមស្មាផ្លូវដើម្បីបង្កើនសោភ័ណភាព និងទប់ស្តាត់ការហូរច្រោះនៃទឹកភ្ញៀង។
ការងារជួសជុលផ្លូវដីថ្មើរជើងនេះ ត្រូវបានបញ្ចប់រួចរាល់ជាស្ថាពរ ហើយក្រុមការងារនៃអាជ្ញាធរជាតិអប្សរា នឹងបន្តការងារពិនិត្យ ថែទាំផ្លូវ និងស្មៅដែលបានដាំនៅតាមស្មាផ្លូវនេះ ដើម្បីរក្សាបាននូវសោភ័ណភាព សុវត្ថិភាពដល់ភ្ញៀវទេសចរ និងការប្រើប្រាស់បានយូរ អង្វែងទៅមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។