រដ្ឋមន្ត្រីក្រសួងបរិស្ថាន៖ ជីវិតរីករាយផ្សារភ្ជាប់ជាមួយទេសចរណ៍ធម្មជាតិ
ភ្នំពេញ៖ នៅក្នុងពិធីប្រគល់ជ័យលាភីការប្រកួតប្រជែងវីដេអូស្តីពីបរិស្ថាន ក្រោមប្រធានបទ«សម្រស់ស្រុកយើង» កាលពីរសៀល ថ្ងៃទី២ ខែកុម្ភៈ ឆ្នាំ២០២១ នៅទីស្តីការក្រសួងបរិស្ថាន ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានលើកឡើងថា នៅពេលប្រទេសកំពុងមានសុខសន្តិភាពពេញលេញ ជាឱកាសនៃការអភិវឌ្ឍទេសចរណ៍ផ្សារភ្ជាប់នឹងធម្មជាតិរបស់ប្រជាជនកម្ពុជា។
ឯកឧត្តមរដ្ឋមន្ត្រី បានបន្ថែមថា នៅពេលកម្ពុជាមានសុខសន្តិភាពនេះហើយ គឺបំផុសឱ្យប្រជាពលរដ្ឋ បានយល់អំពីសក្តានុពល តម្លៃ និងសម្រស់នៃធនធានធម្មជាតិរបស់កម្ពុជា និងមានឱកាសរីករាយផ្សារភ្ជាប់នឹងធម្មជាតិ។ ឯកឧត្តម បានបង្ហាញថា ការជំរុញលើកកម្ពស់សកម្មភាពទេសចរណ៍ផ្សារភ្ជាប់ជាមួយធម្មជាតិ រួមចំណែកសំខាន់ក្នុងកិច្ចការពារអភិរក្សធនធានធម្មជាតិឱ្យកាន់តែរឹងមាំផងដែរ។ ឯកឧត្តម សាយ សំអាល់ បានវាយតម្លៃខ្ពស់ចំពោះការលះបង់របស់យុវជនទាំងអស់ដែលបានបង្ហាញពីទឹកចិត្តស្រឡាញ់ទឹកដី ស្រឡាញ់សន្តិភាព និងបានចូលរួមផ្សព្វផ្សាយបរិស្ថាន តាមរយៈការថតរូប និងផលិតវីដេអូស្អាតៗពីធម្មជាតិដ៏ស្រស់បំព្រងរបស់កម្ពុជាទៅកាន់ពិភពលោក។
ឯកឧត្តមរដ្ឋមន្ត្រី បានគូសបញ្ជាក់បន្ថែមថា ចាប់តាំងពីឯកឧត្តមត្រូវបានរាជរដ្ឋាភិបាលតែងតាំងជារដ្ឋមន្ត្រីក្រសួងសបរិស្ថានមក គឺនៅឆ្នាំ២០១៣ មានកិច្ចការជាច្រើនដែលត្រូវធ្វើ ក្នុងនោះការលើកកម្ពស់ឱ្យមានការចូលរួមពីសាធារណជន គឺជារឿងចាំបាច់មួយក្នុងបុព្វហេតុការពារ និងអភិរក្សធនធានធម្មជាតិ។
ក្នុងឱកាសនោះ ឯកឧត្តម សាយ សំអាល់ បានលើកទឹកចិត្តឱ្យក្រុមទទួលបានជ័យលាភីនាពេលនេះ បន្តខិតខំចូលរួមផ្សព្វផ្សាយបន្ថែមទៀត អំពីសម្រស់ធម្មជាតិស្រុកយើង ដើម្បីជួយលើកកម្ពស់លើវិស័យទេសចរណ៍ផ្សារភ្ជាប់នឹងធម្មជាតិ។ ជាមួយគ្នានេះ ការអភិវឌ្ឍទេសចរណ៍ធម្មជាតិ មិនត្រឹមតែរួមចំណែកលើកកម្ពស់ជីវភាពរបស់ប្រជាសហគមន៍ និងការអភិវឌ្ឍសេដ្ឋកិច្ចមូលដ្ឋាន ប៉ុណ្ណោះទេ ប៉ុន្តែថែមទាំងរួមចំណែកយ៉ាងសំខាន់ដល់កិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវៈចម្រុះ និងការអភិវឌ្ឍដោយចីរភាពផងដែរ។
សូមបញ្ជាក់ថា ក្រសួងបរិស្ថាន បានរៀបចំ ការប្រកួតវីដេអូខ្លីស្តីពីបរិស្ថានឆ្នាំ២០២០ ក្រោមប្រធានបទ «សម្រស់ស្រុកយើង» ចាប់ពីខែកញ្ញា ដល់ខែធ្នូ ឆ្នាំ២០២០។ វីដេអូជាច្រើនរឿងទាក់ទងនឹងជីវិត និងធម្មជាតិបានចូលរួមប្រកួត។ ចុងក្រោយ ក្រសួងបរិស្ថានរកឃើញអ្នកទទួលបានជ័យលាភីឆ្នើម មានចំនួន ១១ក្រុម។ ហើយក្រុម ដែលទទួលជ័យលាភីលេខ១ គឺក្រុមយុវនិនេត្យ ផលិតវីដេអូរឿង «សុបិន្ត» ក្រុមដែលទទួលបានជ័យលាភីលេខ២ គឺក្រុម លោក សារី ប៉ោស៊ីង ផលិតវីដេអូស្តីពី «ឋានសួគ៌ក្រោមមេឃ» និងក្រុមដែលទទួលបានជ័យលាភីលេខ៣ គឺក្រុម The United Media ផលិតវីដេអូស្តីពី «I AM CAMBODIA»៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។