បង្ក្រាបរថយន្តដឹកឈើខុសច្បាប់ ៤គ្រឿង បម្រុងដឹកចេញពីខេត្តកោះកុង ឆ្ពោះទៅភ្នំពេញ
ខេត្តកោះកុង៖ កម្លាំងនៃស្នងការនគរបាលខេត្តកោះកុង សហការជាមួយកម្លាំងនគរបាលស្រុកស្រែអំបិល បានចុះបង្ក្រាបករណីរថយន្តដឹកឈើខុសច្បាប់ចំនួន ៤គ្រឿង ដែលបម្រុងចេញពីខេត្តកោះកុង ឆ្ពោះទៅភ្នំពេញ កាលពីល្ងាច ថ្ងៃទី០២ ខែមីនា ឆ្នាំ២០២១ នៅចំនុចភូមិអូរជ្រៅ ឃុំបឹងព្រាវ ស្រុកស្រែអំបិល និងឃាត់ខ្លួនជនសង្ស័យចំនួន ២នាក់។
ជនសង្ស័យដែលឃាត់ខ្លួនបាននោះ ទី១-ឈ្មោះ ង៉ែត ម៉ៅ ភេទប្រុស អាយុ២៤ឆ្នាំ មានស្រុកកំណើតខេត្តតាកែវ និងទី២-ឈ្មោះ ផាន់ ថន ភេទប្រុស អាយុ២៤ឆ្នាំ រស់នៅភូមិជាំស្លា ឃុំជីផាត ស្រុកថ្មបាំង ខេត្តកោះកុង។ ចំណែកវត្ថុតាងដកហូតបានរថយន្តចំនួន ៤គ្រឿង គឺម៉ាកឡង់គ្រីស័រ ពណ៌ស ពាក់ស្លាកលេខ ភ្នំពេញ 2M-9751, ម៉ាកហាយឡែនឌ័រ ពណ៌មាស ពាក់ស្លាកលេខ ភ្នំពេញ2X-2367, ម៉ាក់ហាយឡែនឌ័រ ពណ៌ស្ក ពាក់ស្លាកលេខ ភ្នំពេញ2Z-2755 និងម៉ាកបាឡែន ពណ៌ស ពាក់ស្លាកលេខភ្នំពេញ2W-2986។
សូមបញ្ជាក់ថា រថយន្តទាំង ៤គ្រឿងនេះ មានផ្ទុកពេញទៅដោយឈើខុសច្បាប់ ដោយជនសង្ស័យទាំង ២នាក់ អង្គុយក្នុងរថយន្តបាឡែន ចំណែកមនុស្សក្នុងរថយន្ត ៣គ្រឿងទៀត បានរត់គេចខ្លួនចូលព្រៃអស់។ បច្ចុប្បន្នជនសង្ស័យ និងវត្ថុតាង បានប្រគល់ឲ្យទៅខាងមន្ទីរបរិស្ថានខេត្ត ចាត់ការតាមនីតិវិធី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។