១០ឆ្នាំ នៃគ្រោះមហន្តរាយ ហ្វូគូស៊ីម៉ា សុវត្ថិភាពបរមាណូគឺជាការប្រឈមុខដំបូងគេ
កាលពី១០ឆ្នាំមុននៅថ្ងៃទី ១១ខែមីនាឆ្នាំ២០១១ មាករណីរញ្ជួយដី ទ្រង់ទ្រាយធំក្នុងប្រវត្តិសាស្ត្រជប៉ុន បានកើតឡើងនៅឆ្នេរសមុទ្រភាគ ខាងជើងនៃប្រទេសនេះ បង្កឲ្យមានរលកយក្សស៊ូណាមិ កម្ពស់៤៣ម៉ែត្រ បំផ្លាញ តំបន់ឆ្នេរសមុទ្រជម្រៅ ១០គីឡូម៉ែត្រ ។ គ្រោះមហន្តរាយនោះបានសម្លាប់មនុស្សជិត២ម៉ឺននាក់ ហើយបំផ្លាញទីតាំងបរមាណូ Fukushima Daiichi បងឲ្យមានវិបត្តិវិទ្យុសកម្ម នៅក្នុងតំបន់។
ក្រៅពីផ្ដាច់ជីវិតមនុស្ស គ្រោះរញ្ជួយដីយ៉ាងកក្រើកកម្រិត ៩.០រ៉ិចទ័របានបង្ករលកយក្សស៊ូណាមិកម្ពស់ជាង ៣០ម៉ែត្រ ដោយបានបំផ្លាញរោងចក្រថាមពលនុយក្លេអ៊ែរ ហ្វូគូស៊ីម៉ា ដៃអ៉ីឈិ (Fukushima Daiichi) ក្នុងក្រុងអូគូម៉ា (Okuma) នៃខេត្ត Fukushima ធ្វើឱ្យលេចធ្លាយសារធាតុវិទ្យុសកម្ម ដែលជាមហន្តរាយនុយក្លេអ៊ែរអាក្រក់បំផុត នៅលើពិភពលោក គិតចាប់តាំងតែពីគ្រោះ មហន្តរាយនៅរោងចក្រថាមពលនុយក្លេអ៊ែរ ឆឺណូប៊ូល (Chernobyl) របស់សហភាពសូវៀតកាលពីឆ្នាំ១៩៨៦មក។
ព្រះចៅអធិរាជជប៉ុន ណារុហ៊ីតុ (Naruhito), នាយករដ្ឋមន្ត្រីជប៉ុន លោក ស៊ូហ្គា យ៉ូស៊ីហ៊ីដេ (Suga Yoshihide), និងប្រជាជនជប៉ុនទាំងឡាយ នឹងប្រារព្ធពិធីស្មឹងស្មាធគោរពវិញណក្ខន្ធ នៅវេលាម៉ោង ២៖៤៦នាទីរសៀលថ្ងៃព្រហស្បតិ៍នេះ (ម៉ោងនៅទីក្រុងតូក្យូ) ជូនដល់ជនរងគ្រោះនៅក្នុងព្រឹត្តិការណ៍គ្រោះរញ្ជួយដី និងមហារលកយក្សស៊ូណាមិ ថ្ងៃទី១១ ខែមីនា ឆ្នាំ២០១១ ខណៈពិធីជាច្រើនទៀត ក៏ត្រូវបានគេគ្រោងនឹងរៀបចំឡើង នៅទូទាំងតំបន់ភាគឦសាន នៃប្រទេសជប៉ុនផងដែរ។
គួរបញ្ជាក់ថា រដ្ឋាភិបាលជប៉ុនបានចំណាយប្រាក់ជាង ៣០០ពាន់លានដុល្លារ ដើម្បីជួសជុលតំបន់រងការខូចខាត និងបំផ្លាញដោយរលកយក្សស៊ូណាមិ ប៉ុន្តែរោងចក្រថាមពលនុយក្លេអ៊ែរ Fukushima Daiichi នៅតែស្ថិតនៅក្រោមការដាក់កំហិតនៅឡើយ ដោយសារបារម្ភពីសារធាតុវិទ្យុសកម្ម។ បើតាមការស្ទង់មតិ ធ្វើឡើងដោយទូរទស្សន៍ NHK ប្រជាជនជប៉ុន ៨៥ភាគរយ នៅតែព្រួយបារម្ភពីឧប្បដិហេតុនុយក្លេអ៊ែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។