អូស្ត្រាលី ជម្លៀសប្រជាជន ចេញពីតំបន់ជាយក្រុងស៊ីដនី រងគ្រោះដោយទឹកជំនន់
អូស្ត្រាលី៖ អាជ្ញាធរអូស្ត្រាលីនៅថ្ងៃចន្ទនេះ មានផែនការជម្លៀសប្រជាជនរាប់ពាន់នាក់បន្ថែមទៀត ចេញពីតំបន់ជាយក្រុងស៊ីដនីភាគខាងលិច ដែលរងផលប៉ះពាល់ដោយសារទឹកជំនន់អាក្រក់បំផុតក្នុងរយៈពេល៦០ឆ្នាំ ខណៈភ្លៀងធ្លាក់ឥតឈប់ឈរត្រូវបានគេព្យាករណ៍ថា នឹងបន្តធ្លាក់ក្នុងរយៈពេលប៉ុន្មានថ្ងៃខាងមុខ។
ភ្លៀងធ្លាក់ខ្លាំងក្នុងរយៈពេលបីថ្ងៃកន្លងមកនេះ បានធ្វើឲ្យទឹកទន្លេនៅក្នុងរដ្ឋដែលមានប្រជាជនច្រើនបំផុត New South Wales ឡើងយ៉ាងគំហុក ដែលបង្កឲ្យមានការខូចខាតយ៉ាងធំធេង និងជំរុញឲ្យមានការអំពាវនាវជម្លៀសប្រជាជនទ្រង់ ទ្រាយធំ ។ សេវាគ្រាអាសន្នរដ្ឋនេះ បានបង្ហោះសារនៅលើ Twitter កាលពីថ្ងៃអាទិត្យថា ទឹកជំនន់នេះ ទំនងជាខ្ពស់ជាងទឹកជំនន់ណាៗទាំងអស់គិតចាប់តាំងពីខែវិច្ឆិកាឆ្នាំ១៩៦១មក ។
អាជ្ញាធររំពឹងថា អាកាសធាតុអាក្រក់នឹងបន្តរហូតដល់ថ្ងៃពុធសប្តាហ៍នេះ។ ដោយឡែកការិយាល័យអាកាសធាតុរបស់អូស្ត្រាលីបានបញ្ជាក់ថា ផ្នែកធំៗនៃឆ្នេរភាគខាងកើតរបស់ប្រទេស នឹងរងការវាយប្រហារដោយភ្លៀងធ្លាក់ខ្លាំង ចាប់ពីថ្ងៃចន្ទដើមសប្តាហ៍នេះទៅ ខណៈការព្រមានអំពីទឹកជំនន់ធ្ងន់ធ្ងរត្រូវបានចេញសម្រាប់ផ្នែកធំៗនៃរដ្ឋ New South Wales និង រដ្ឋ Queensland ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។