កម្ពុជា បន្តរកឃើញអ្នកឆ្លងកូវីដ១៩ថ្មី ២៩នាក់ទៀត និងមានអ្នកជាសះស្បើយ ៣៤នាក់
ភ្នំពេញ៖ ក្រសួងសុខាភិបាល នៅព្រឹកថ្ងៃទី២៤ ខែមីនា ឆ្នាំ២០២១នេះ បានប្រកាសបន្តពីការរកឃើញអ្នកឆ្លងកូវីដ១៩ថ្មីចំនួន ២៩នាក់ទៀត ខណៈអ្នកជំងឺចំនួន ៣៤នាក់បានជាសះស្បើយ។
ក្រសួង បញ្ជាក់ទៀតថា អ្នកឆ្លងជំងឺកូវីដ១៩ថ្មីទាំង ២៩នាក់នោះ មាន២នាក់ ជាករណីនាំចូលពីក្រៅប្រទេស និង២៧នាក់ ជាករណីឆ្លងក្នុងសហគមន៍ មានជនជាតិខ្មែរ ជនជសតិចិន ជនជាតិនីហ្សេរីយ៉ា និងជនជាតិអាមេរិក ដែលរកឃើញនៅរាជធានីភ្នំពេញ ២២នាក់ ខេត្តកោះកុង ៣នាក់ ខេត្តព្រៃវែងម្នាក់ និងត្បូងឃ្មុំម្នាក់។
ចំណែកករណីជាសះស្បើយទាំង ៣៤នាក់ ជាអ្នកឆ្លងក្នុងសហគមន៍ ៣៣នាក់ និងអ្នកដំណើរពីក្រៅប្រទេស ម្នាក់ ដោយទទួលបានលទ្ធផលតេស្តអវិជ្ជមាន និងបានអនុញ្ញាតអោយចេញពីកន្លែងសម្រាកព្យាបាល។
សូមជម្រាបថា គិតត្រឹមព្រឹក ថ្ងៃទី២៤ ខែមីនា ឆ្នាំ២០២១នេះ កម្ពុជា រកឃើញអ្នកឆ្លងជំងឺកូវីដ១៩ សរុបចំនួន ១ ៨១៧នាក់ ក្នុងនោះព្យាបាលជាសះស្បើយ ១ ០៣៣នាក់ កំពុងសម្រាកព្យាបាល ៧៧៧នាក់ ស្លាប់ដោយកូវីដ១៩ ៥នាក់ និង២នាក់ទៀត ស្លាប់ដោយសារជំងឺរើឡើង ក្នុងពេលព្យាបាលជំងឺកូវីដ១៩។ សម្រាប់អ្នកឆ្លងក្នុងសហគមន៍ គឺកើនឡើង ១ ២៩៣នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។