រថយន្តនីសាន់ បុកម៉ូតូពេញទំហឹង ស្លាប់ម្នាក់នៅនឹងកន្លែង
ខេត្តព្រះសីហនុ៖ កាលពីយប់ ថ្ងៃទី២៧ ខែមីនា ឆ្នាំ២០២១ មានករណីគ្រោះថ្នាក់ចរាចរណ៍មួយ បានកើតឡើងរវាងរថយន្តនីសាន់ បុកម៉ូតូជាមួយគ្រឿង១គ្រឿង បណ្តាលឲ្យមនុស្សស្លាប់ម្នាក់ភ្លាមៗ នៅផ្លូវជាតិលេខ៤ ក្នុងភូមិស្ទឹងសំរោង ឃុំអូរបាក់រទេះ ស្រុកកំពង់សីលា ខេត្តព្រះសីហនុ។
សមត្ថកិច្ចមូលដ្ឋាន បានឲ្យដឹងថា ករណីគ្រោះថ្នាក់នេះកើតឡើង រវាងរថយន្ត១គ្រឿង ម៉ាកនីសាន់ពណ៌ទឹកប៊ិច ពាក់ស្លាកលេខភ្នំពេញ 3A-8326 សណ្តោង កុងទីន័រ ពាក់ស្លាកលេខ ភ្នំពេញ 4A-5013 ធ្វើដំណើរពីខេត្តព្រះសីហនុ ទៅភ្នំពេញ លុះដល់ចំណុចកើតហេតុ រថយន្តក៏បត់ឆ្វេង ស្រាប់តែបុកម៉ូតូ១គ្រឿងម៉ាក សង់សេ១២៥ ពណ៌ខ្មៅ ពាក់ស្លាកលេខ ភ្នំពេញ1BN-7585 ទិសដៅផ្ទុយគ្នា បណ្តាលឲ្យអ្នកបើកម៉ូតូនោះ ស្លាប់នៅនឹងកន្លែងតែម្តង។ ជនរងគ្រោះឈ្មោះ ថៃ ដា ភេទប្រុស អាយុ៣៥ឆ្នាំ មានទីលំនៅភូមិ/ឃុំខាងលើ។
ក្រោយពេលកើតហេតុ អ្នកបើករថយន្តរត់គេចខ្លួនបាត់ រីឯសាកសពត្រូវបានក្រុមគ្រួសារយកទៅធ្វើបុណ្យតាមប្រពៃណី។ រថយន្ត និងម៉ូតូ បានទៅរក្សាទុក្ខ នៅអធិការស្រុកកំពង់សីលា ដើម្បីដោះស្រាយបន្តតាមនិតិវិធី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។