គ្រោះថ្នាក់ចរាចរណ៍! រវាងរថយន្ត២គ្រឿង បុកគ្នាពេញទំហឹង ស្លាប់អ្នកបើកបរម្នាក់នៅនឹងកន្លែង
ខេត្តសៀមរាប៖ កាលពីពីវេលាម៉ោងជាង ១១យប់ ថ្ងៃទី៣០ ខែមីនា ឆ្នាំ២០២១ មានករណីគ្រោះថ្នាក់ចរាចរណ៍មួយ រវាងរថយន្ត២គ្រឿង បុកគ្នាពេញទំហឹង ក្នុងល្បឿនលឿនដូចគ្នា នៅលើផ្លូវជាតិលេខ៦៨ ស្ថិតនៅភូមិតាស្រី ឃុំសែនសុខ ស្រុកក្រឡាញ់ ខេត្តសៀមរាប បណ្តាលឲ្យអ្នកបើកបរម្នាក់ ស្លាប់ភ្លាមៗ។
យោងតាមរបាយការណ៍ពីនគរបាលស្រុកក្រឡាញ់ បានអោយដឹងថា ករណីគ្រោះថ្នាក់ចរាចរណ៍នេះ បង្កឡើងដោយរថយន្ត១គ្រឿង ម៉ាក ToYoTa CAMRY ពណ៌ស្លែរ ពាក់ស្លាកលេខ ភ្នំពេញ2B.7985 ទិសដៅពីត្បូងទៅជើង បើកក្នុងល្បឿនលឿន លុះមកដល់ចំណុចកើតហេតុ ក៏រ៉េចង្កូតទៅឆ្វេងបុកជាមួយរថយន្ត១គ្រឿងទៀត ម៉ាកហ៊ីយ៉ាន់ដាយ ពណ៌ខៀវ ពាក់ផ្លាកលេខ បន្ទាយមានជ័យ 3A.1784 ទិសដៅពីជើងទៅត្បូង បណ្តាលឲ្យអ្នកបើកបរស្លាប់តែម្តង។
ជនរងគ្រោះជាអ្នកបើកបររថយន្តបង្ក ឈ្មោះ ចាន់ សុភាព ភេទប្រុស អាយុ៣៨ឆ្នាំ រស់នៅភូមិកំបោរ ឃុំមោង ស្រុកស្រីស្នំ ខេត្តសៀមរាប (ស្លាប់)។ រីឯភាគីម្ខាងទៀត មិនស្គាល់អត្តសញ្ញាណ។
ក្រោយកើតហេតុ សមត្ថកិច្ចជំនាញបានចុះវាស់វែងធ្វើកំណត់ហេតុ និងប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី។ ចំណែកវត្ថុតាង យកមករក្សាទុកនៅអធិការដ្ឋាននគរបាលស្រុកក្រឡាញ់ ដើម្បីអនុវត្តតាមនីតិវិធីច្បាប់បន្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។