គោយន្តដឹកស្រូវ បាក់សាក់ស៊ីរ៉ឺម៉ក រអិលការ៉ុងស្រូវសង្កត់កៀបខ្ទប់បុរសម្នាក់ ជាប់នឹងដែកទទឹងដៃចង្កូត ស្លាប់ភ្លាមៗ
បន្ទាយមានជ័យ៖ បុរសម្នាក់ បានស្លាប់ភ្លាមៗ ខណៈដឹកស្រូវពេញគោយន្ត បណ្តាលឲ្យបាក់សាក់ស៊ីរ៉ឺម៉ ត្រូវការុងស្រូវរអិលសង្កត់ខ្ទប់កៀបនឹងដែកទទឹងដៃចង្កូតគោយន្តកន្ត្រៃ។ ហេតុការណ៍នេះ កើតឡើងកាលពីល្ងាច ថ្ងៃទី០៦ ខែមេសា ឆ្នាំ២០២១ នៅចំណុចអូតាតោ ស្ថិតក្នុងភូមិសាស្ត្រភូមិក្របៅ ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ។
ជនរងគ្រោះ ឈ្មោះ សែម មុំ អាយុ៤៨ឆ្នាំ ភេទប្រុស នៅភូមិក្បាលក្របី ឃុំសំបួរ ស្រុកមង្គលបូរី ខេត្តបន្ទាយមានជ័យ។ មូលហេតុ បង្កឲ្យគ្រោះថ្នាក់នេះ គឺសង្ស័យដែកសាក់ស៊ីរ៉ឺម៉កគោយន្ត មានសភាពចាស់ នៅពេលដឹកស្រូវធ្ងន់ បានបាក់ហើយការុងស្រូវរអិលសង្កត់អ្នកបើកបរ កៀបខ្ទប់នឹងដែកទទឹងដៃចង្កូតគោយន្ត បណ្តាលឲ្យស្លាប់តែម្តង។
ក្រោយពេលកើតហេតុ អាជ្ញាធរមូលដ្ឋាន បានចុះពិនិត្យ និងបានប្រគល់សពជនរងគ្រោះជូនក្រុមគ្រួសារ យកទៅចាត់ចែងធ្វើបុណ្យតាមប្រពៃណី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។