រថយន្តក្រុងសាធារណៈរបស់សាលារាជធានីភ្នំពេញ នឹងផ្អាកការបម្រើសេវានៅថ្ងៃទី២៩ កក្កដា
យោងតាមសេចក្តីជូនដំណឹងមួយរបស់រដ្ឋបាលរាជធានីភ្នំពេញបានឲ្យដឹងថា ខ្លួននឹងផ្អាកសេវាដឹកជញ្ជូនសាធារណៈរថយន្តក្រុង រយៈពេល១ថ្ងៃ គឺនៅថ្ងៃអាទិត្យ ទី២៩ ខែកក្កដា ខាងមុខ។
ការផ្អាកនេះ គឺដើម្បីអនុវត្តតាមការអំពាវនាវរបស់គណៈកម្មាធិការជាតិរៀបចំការបោះឆ្នោត និងក្រសួងការងារបណ្តុះបណ្តាលវិជ្ជាជីវៈ ដើម្បីឲ្យបុគ្គលិករដ្ឋាករបានអនុវត្តសិទ្ធិ ក្នុងនាមពលរដ្ឋខ្មែរបានទៅចូលរួមបោះឆ្នោតជ្រើសតាំងតំណាងរាស្រ្តនីតិកាលទី៦ ដែលនឹងប្រព្រឹត្តទៅនៅថ្ងៃទី២៩ ខែកក្កដា។
យ៉ាងណាក៏ដោយ សាលារាជធានីភ្នំពេញបានបញ្ជាក់ថា ខ្លួននឹងដាក់ឲ្យដំណើរការជាធម្មតាឡើងវិញនូវសេវារថយន្តក្រុង នាថ្ងៃទី៣០ ខែកក្កដា ឆ្នាំ២០១៨ អាស្រ័យហេតុនេះ សូមបងប្អូនប្រជាពលរដ្ឋដែលប្រើប្រាស់សេវាដឹកជញ្ជូនសាធារណៈរថយន្តក្រុងទាំងអស់មេត្តាជ្រាប និងយោគយល់អធ្យាស្រ័យ ចំពោះការផ្អាកដំណើរការខាងលើនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។