ចិន ផ្តល់ជំនួយវ៉ាក់សាំង ៤០ម៉ឺនដូសទៀត នឹងបញ្ជូនមកដល់កម្ពុជា ចុងខែមេសានេះ
ស្ថានទូតចិនប្រចាំកម្ពុជា នាព្រឹកថ្ងៃទី១៣ មេសា នេះបានប្រកាសតាមហ្វេសបុកផ្លូវការរបស់ខ្លួនថា មានដំណឹងល្អ ដោយបញ្ជាក់ថា ដើម្បីគាំទ្ររាជរដ្ឋាភិបាលកម្ពុជាក្នុងកិច្ចប្រយុទ្ធប្រឆាំងជំងឺវីរុសកូវីដ-១៩ រដ្ឋាភិបាលចិនសម្រេចផ្តល់ជំនួយឥតសំណងជាវ៉ាក់សាំងកូវីដ Sinopharm ចំនួន ៤០ ម៉ឺនដូសបន្ថែមទៀតដល់ភាគីកម្ពុជា។
វ៉ាក់សាំងទាំងនេះនឹងដឹកជញ្ជូនមកដល់ប្រទេសកម្ពុជានាចុងខែមេសាខាងមុខនេះតាមរយៈជើងហោះហើរពាណិជ្ជកម្ម។ ចិនបានផ្តល់ជំនួយឥតសំណងជាវ៉ាក់សាំងបង្ការជំងឺកូវីដ១៩ ចំនួន១លាន៣សែនរួចមកហើយ។
ថ្មីៗនេះ សម្តេច ហ៊ុន សែន នាយករដ្ឋមន្ត្រីកម្ពុជាបានលើកឡើងដែរថា វ៉ាក់សាំងបង្ការជំងឺកូវីដ១៩នឹងបញ្ជូនមកដល់កម្ពុជាជាបន្តបន្ទាប់ទៀត នៅក្រោយពិធីបុណ្យចូលឆ្នាំថ្មី ប្រពៃណីជាតិ។
បច្ចុប្បន្ន កម្ពុជាមានវ៉ាក់សាំង៣ប្រភេទកំពុងចាក់ជូនពលរដ្ឋដោយគិតថ្លៃ រួមមាន ស៊ីណូហ្វាម ស៊ីណូវ៉ាក់ និង វ៉ាក់សាំងកូវីសៀ ក្រោមយន្តការកូវ៉ាក់របស់អង្គការសុខភាពពិភពលោក។ កម្ពុជាបានចាក់វ៉ាក់សាំងជូនពលរដ្ឋទូទាំងជាង១លាននាក់ហើយ តាំងពីថ្ងៃទី១០ កុម្ភៈមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។