លោក ឆាំង យុ ឈ្នះពានរង្វាន់ណូបែលទ្វីបអាស៊ី
លោក ឆាំង យុ នាយកមជ្ឈមណ្ឌលឯកសារកម្ពុជា (DC-Cam) បានឈ្នះពានរង្វាន់ Ramon Magsaysay លើកទី៦០ ដែលជាពានរង្វាន់ដ៏ធំមួយប្រចាំតំបន់ ប្រៀបដូចពានរង្វាន់ណូបែល (Nobel) ប្រចាំទ្វីបអាស៊ី។
លោកគឺជាអ្នកឈ្នះមួយរូប ក្នុងចំណោមអ្នកឈ្នះទាំង ៦រូប នៅក្នុងឆ្នាំ២០១៨ នេះ។ អ្នកឈ្នះ ៥រូបផ្សេងទៀត រួមមានលោក Dee Howard (ហ្វីលីពីន) លោកស្រី Cruz Maria de Lourdes Martins (ទីម័រ) លោក Vatwani Bharat (ឥណ្ឌា) លោកស្រី Vo Thi Hoang Yen (វៀតណាម) និងលោក Wangchuk Sonam (ឥណ្ឌា)។ ពិធីប្រគល់ពានរង្វាន់ ដល់អ្នកឈ្នះទាំង ៦រូប នឹងធ្វើឡើងនៅទីក្រុងម៉ានីល ប្រទេសហ្វីលីពីន នាថ្ងៃទី៣១ ខែសីហា ឆ្នាំ២០១៨។
គេហទំព័រផ្លូវការបស់ពានរង្វាន់ Ramon Magsaysay បានបញ្ជាក់ថា លោកឆាំង យុ បានឈ្នះពានរង្វាន់នេះ ដោយសារតែលោកបានរួមចំណែករក្សាការចងចាំជាប្រវត្តិសាស្ដ្រ សម្រាប់ការផ្សះផ្សា និងភាពយុត្តធម៌នៅក្នុងប្រទេសកម្ពុជា។
លោក ឆាំង យុ អាយុ ៥៧ឆ្នាំ គឺជាជនរងគ្រោះមួយរូបនៅក្នុងរបបខ្មែរក្រហម ដែលបានភៀសខ្លួនទៅកាន់សហរដ្ឋអាមេរិក។ លោកបានវិលត្រឡប់មកប្រទេសកម្ពុជាវិញនៅដើមទសវត្សរ៍ ១៩៩០ ហើយបានដឹកនាំមជ្ឈមណ្ឌលឯកសារកម្ពុជា ចាប់តាំងពីឆ្នាំ១៩៩៥ មក។ មជ្ឈមណ្ឌលឯកសារកម្ពុជា ជាកន្លែងប្រមូលព័ត៌មានដើម្បីស្វែងរកភាពយុត្តិធម៌ដល់ជនរងគ្រោះក្នុងរបបខ្មែរក្រហម។
សូមបញ្ជាក់ថា ពានរង្វាន់ Ramon Magsaysay ត្រូវបានបង្កើតឡើងនៅក្នុងឆ្នាំ១៩៥៧ ដើម្បីជាការរំឭកដល់ការដឹកនាំរបស់ប្រធានាធិបតីទី៧ របស់ហ្វីលីពីន Ramon Magsaysay ដែលបានស្លាប់ក្នុងគ្រោះថ្នាក់ធ្លាក់យន្តហោះ កាលពីឆ្នាំ១៩៥៧៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។