ឃាត់ខ្លួនបុរសម្នាក់ ករណីចែកចាយគ្រឿងញៀន នៅក្រុងខេមរភូមិន្ទ
ខេត្តកោះកុង៖ កាលពីរសៀល ថ្ងៃទី២៧ ខែមេសា ឆ្នាំ២០២១ កម្លាំងជំនាញផ្នែកប្រឆាំងបទល្មើសគ្រឿងញៀន បានចុះល្បាតក្នុងភូមិសាស្ត្រស្មុគស្មាញងាយរងគ្រោះមួយចំនួន លុះដល់ចំណុចតូបលក់ចាប់ហួយមួយកន្លែង ស្ថិតក្នុងភូមិ៣ សង្កាត់ដងទង់ ក៏ប្រទះឃើញជនសង្ស័យម្នាក់ ដែលជាមុខសញ្ញាចាស់កំពុងតាមរកកំពុងអង្គុយហូបមី នៅមុខតូបលក់ចាប់ហួយ ភ្លាមៗក៏បានឃាត់ខ្លួនជនសង្ស័យ និងឆែកឆេររកឃើញម្សៅក្រាមសថ្លាសង្ស័យជាសារធាតុញៀនខុសច្បាប់។
ជនសង្ស័យឈ្មោះ ចាន់ រ័ត្នតារា ភេទប្រុស អាយុ២៧ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅភូមិស្ទឹងវែង សង្កាត់ស្ទឹងវែង។ ចំណែកវត្ថុតាងដកហូតបាន រួមមាន៖ ម្សៅក្រាមសថ្លាចំនួន ១១កញ្ចប់ (១កញ្ចប់ធំ, ១០កញ្ចប់តូច) និងឧបករណ៍ជក់មួយចំនួន។
ជនសង្ស័យ ត្រូវបានកម្លាំងជំនាញ កសាងសំណុំរឿងបញ្ជូនទៅសាលាដំបូងខេត្តចាត់ការតាមនីតិវិធីច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។