៥ខែដំបូង ឆ្នាំនេះ! វៀតតណាម ទំហំកើនឡើងប្រមាណ ១៤ពាន់លានដុល្លារ
វៀតណាម៖ ទំហំវិនិយោគផ្ទាល់ពីបរទេសនៅប្រទេសវៀតណាមបានកើនឡើង០.៨ភាគរយ ក្នុងពេល៥ខែដំបូងនៃឆ្នាំ២០២១ បើធៀបនឹងពេលដូចគ្នា កាលពីឆ្នាំ២០២០ នេះបើតាមក្រសួងផែនការនិងវិនិយោគវៀតណាម ចេញផ្សាយកាលពីថ្ងៃទី២៧ ឧសភា ២០២១ ចេញផ្សាយដោយទីភ្នាក់ងារព័ត៌មាន VNexpress។
ក្រសួងថា ការវិនិយោគបរទេសក្នុងពេល៥ខែ មកនេះ មានចំនួន១៤ពាន់លានដុល្លារអាមេរិក ក្នុងចំណោមនេះ មានគម្រោងចុះបញ្ជីថ្មីចំនួន៦១៣គម្រោង មានទំហំវិនិយោគ៨.៨៣ពាន់លានដុល្លារអាមេរិក។ សិង្ហបុរីគឺជាប្រទេសវិនិយោគបរទេសធំជាងគេ មានជាង៣៧ភាគរយ ហើយក្រៅពីនេះ ក៏មានជប៉ុន កូរ៉េខាងត្បូង ចិន ជាដើម។
ប្រភពបន្ថែមទៀតថា ការវិនិយោគទាំងនោះមាននៅខេត្តក្រុងចំនួន៥៦ ក្នុងនោះ តំបន់ភាគខាងត្បូងចំនួន៤ មានច្រើនជាងគេ មានដូចជា Long An និង Can Tho ជាដើម ដែលបានទាក់ទាញការវិនិយោគ ៣.៣៥ពាន់លានដុល្លារ និង ១.៣២ពាន់លានដុល្លារ ខណៈតំបន់ពាណិជ្ជកម្មហូជីមីញ មាន១.៣៤ពាន់លានដុល្លារអាមេរិក និងក្រុង Binh Duong ១.១ពាន់លានដុល្លារអាមេរិក។
គួររម្លឹកថា កាលពីឆ្នាំ២០២០ ទំហំវិនិយោគផ្ទាល់ពីបរទេស (FDI) នៅវៀតណាមបានធ្លាក់ចុះ២៥ភាគរយ ដោយសារតែការរាត្បាតនៃជំងឺកូវីដ១៩ ក្នុងនោះ មានសរុប២៨.៥ពាន់លានដុល្លារអាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។