ករណីបាក់ស្រុតអគារខុនដូនៅអាមរិក នៅមានមនុស្ស ១៥០នាក់បាត់ខ្លួននៅឡើយ
សារព័ត៌មាន AP នៅព្រឹកថ្ងៃចន្ទ ទី២៨ ខែមិថុនា ឆ្នាំ២០២១បានដកស្រង់សំដីមន្ត្រីអាមេរិកបញ្ជាក់ថា រហូតមកទល់ពេលនេះចំនួនអ្នកស្លាប់ ដោយសារការបាក់រលំអគារខុនដូកម្ពស់ ១២ជាន់ នៅតំបន់ Miami-Dade County រដ្ឋផ្ល័ររីដា ភាគខាងត្បូងសហរដ្ឋអាមេរិក បានកើនឡើងដល់ ០៩នាក់ហើយ ខណៈអ្នកបាត់ខ្លួនវិញកើនឡើងដល់ជាង ១៥០នាក់ ដែលធ្វើឱ្យក្រុមគ្រួសារសាច់ញាតិជនរងគ្រោះ មានការខកចិត្តយ៉ាងខ្លាំង ចំពោះល្បឿននៃកិច្ចខិតខំប្រឹងប្រែងជួយសង្គ្រោះនេះ។
ខណៈចំនួនអ្នកស្លាប់ បានកើនឡើងដល់ ០៩នាក់នៅថ្ងៃអាទិត្យនេះ ក្រុមគ្រួសារសាច់ញាតិជនរងគ្រោះ មានការអស់សង្ឃឹមយ៉ាងខ្លាំង ចំពោះដំណឹងមួយនេះ និងមានការព្រួយបារម្ភកាន់តែខ្លាំងផងដែរ ចំពោះការធ្លាក់ចុះនៃកិច្ចខិតខំប្រឹងប្រែងជួយសង្គ្រោះ។ គ្មាននរណាម្នាក់ ត្រូវបានទាញចេញពីគំនរបាក់បែកនោះ ដោយនៅរស់រានមានជីវិតទេ ចាប់តាំងពីថ្ងៃព្រហស្បតិ៍សប្ដាហ៍មុន ប៉ុន្មានម៉ោងបន្ទាប់ពីការបាក់រលំ ផ្នែកនៃអគារកម្ពស់ ១២ជាន់នោះមក។
សមាជិកគ្រួសារជនរងគ្រោះខ្លះ ត្រូវបានដឹកតាមរថយន្តក្រុង នៅថ្ងៃអាទិត្យនេះទៅកាន់ទីតាំងមួយ នៅជិតកន្លែងកើតហេតុនោះ បន្ទាប់ពីពួកគេបានបង្ហោញពីការខកចិត្តយ៉ាងខ្លាំង ទៅនឹងល្បឿននៃកិច្ចខិតខំប្រឹងប្រែងជួយសង្គ្រោះ ដោយបានទាមទារអាជ្ញាធរអនុញ្ញាតឱ្យពួកគេ ទៅរង់ចាំមើលនៅកន្លែងកើតហេតុ និងបានជំរុញឱ្យអាជ្ញាធរនាំអ្នកជំនាញមកពីប្រទេសផ្សេង មកជួយសង្គ្រោះផងដែរ។
ស្ត្រីម្នាក់បានប្រាប់ក្រុមអ្នកជួយសង្គ្រោះ ក្នុងកំឡុងកិច្ចប្រជុំជាមួយសមាជិកគ្រួសារជនរងគ្រោះ នៅចុងសប្តាហ៍មុននេះថា «កូនស្រីរបស់ខ្ញុំមានអាយុ ២៦ឆ្នាំមានសុខភាពល្អឥតខ្ចោះ។ នាងប្រាកដជាអាចចេញពីទីនោះបាន»។ អ្នកម្តាយរូបនេះបន្តថា «វាមិនគ្រប់គ្រាន់ទេ… សាកស្រមៃមើល ប្រសិនបើកូនរបស់អ្នកនៅទីនោះ»។
គួរបញ្ជាក់ថា អគារខុនដូរដែលបានបាក់រំលំមួយផ្នែកខាងលើនេះ ត្រូវបានគេរាយការណ៍ថា សាងសង់ឡើងនៅក្នុងឆ្នាំ១៩៨១ ដោយមានសរុបទាំងអស់ ១៣៦បន្ទប់ ហើយប្រមាណ ៥៥បន្ទប់បានបាក់រលំចុះមក។ មិនទាន់មានការបញ្ជាក់ អំពីមូលហេតុដែលនាំឲ្យមានហេតុការណ៍ខាងលើនេះឡើយ ខណៈការប្រឹងប្រែងជួយសង្គ្រោះ កំពុងបន្តប្រព្រឹត្តទៅនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។