ករណីក្រឡាប់រថយន្ត ធា្លក់ចូលប្រឡាយ ស្លាប់មនុស្ស៤នាក់ នៅស្រុកស្វាយចេក!
ខេត្តបន្ទាយមានជ័យ៖ យ៉ាងហោចណាស់មនុស្សចំនួន ៤នាក់ បានស្លាប់ភ្លាមៗ ក្នុងហេតុការណ៍គ្រោះថ្នាក់ចរាចរណ៍ក្រឡាប់រថយន្ត ធ្លាក់ចូលប្រឡានទឹក កាលពីវេលាម៉ោង១និង៣០នាទីរសៀល ថ្ងៃទី២២ ខែសីហា ឆ្នាំ២០២១ លើផ្លូវអភិវឌ្ឍ ចម្ងាយ២គីឡូម៉ែត្រ ខាងលិចភូមិខ្វាវលិច ឃុំស្វាយចេក ស្រុកស្វាយចេក ខេត្តបន្ទាយមានជ័យ ។
អាជ្ញាធរមូលដ្ឋាន បានឲ្យដឹងថា ជនរងគ្រោះទាំង ៤នាក់ មានឈ្មោះ គឹម ហេង ភេទប្រុស អាយុ៥៥ឆ្នាំ, ឈ្មោះ គង់ សុវណ្ណា ភេទស្រី អាយុ៥៣ឆ្នាំ, ឈ្មោះ ហេង រតនា ភេទស្រី អាយុ៦ឆ្នាំ និងឈ្មោះ គឹម ធា ភេទស្រី អាយុ៤២ឆ្នាំ។ ជនរងគ្រោះទាំង ៤នាក់ រស់នៅភូមិយាងថ្មី ឃុំកូប ស្រុកអូរជ្រៅ ខេត្តបន្ទាយមានជ័យ បានជិះរថយន្តម៉ាក ម៉ាស្តា ពណ៌ស ពាក់ស្លាកលេខ កម្ពុជា MR.SELA។
ប្រភពបន្តថា មុនពេលកើតហេតុ រថយន្តបានធ្វើដំណើរពីទិសខាងកើតទៅលិច ពេលមកដល់ចំណុចកើតហេតុ ជាចំណុចផ្លូវបំបែក បានរេចង្កូតធ្លាក់ពីលើផ្លូវ ចូលក្នុងទឹកប្រឡាយផ្ងារជើង បណ្តាលឲ្យស្លាប់អ្នកបើកបរ និងអ្នករួមដំណើរទាំងអស់ ៤នាក់។
ក្រោយពេលកើតហេតុ សពជនរងគ្រោះ ត្រូវបានកម្លាំងនគរបាលប៉ុស្តិ៍រដ្ឋបាល និងប្រជាពលរដ្ឋជួយស្រង់យកមកដាក់លើគោក ដើម្បីស្រាវជ្រាវរកសាច់ញាតិ ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។