ទាហានអាមរិកចុងក្រោយ ចាកចេញពីអាហ្វហ្គានីស្ថានបញ្ចប់សង្គ្រាមរយៈ២០ឆ្នាំ
ក្រុមតាលីបង់បានបាញ់កាំភ្លើងអបអរសាទរ ក្រោយយុទ្ធនាការជម្លៀសពលរដ្ឋ ក៏ដូចជាកម្លាំងទាហានបណ្តាប្រទេសលោកខាងលិចបានបញ្ចប់ទៅ នៅថ្ងៃទី ៣០ខែសីហា បញ្ចប់សង្គ្រាមរយៈពេលយូបំផុតរបស់អាមេរិក គឺមានរយៈពេល ១៩ឆ្នាំ ១០ខែ និង ២៥ថ្ងៃ នៅលើទឹកដីអាហ្វហ្គានីស្ថាន។
ទាហានអាមេរិក បានប្រកាសរូបភាពចុងក្រោយបង្អស់នៃកម្លាំងទាហានអាមេរិក ឡើងយន្តហោះចាកចេញពីអាហ្វហ្គានីស្ថាន នៅយប់ថ្ងៃទី ៣០ខែសីហា។ មន្ទីរបញ្ចកោណអាមេរិកបានប្រកាសថា ទាហានចុងក្រោយបង្អស់របស់អាមេរិកចាកចេញពីទីក្រុងកាប៊ុលមុនការគ្រោងទុកដល់ទៅ២៤ម៉ោង។
សារព័ត៌មាន Daily Mail របស់អងគ្លេសបានផ្សាយថា កម្លាំងទាហានម្នាក់ចុងក្រោយគេបង្អស់ក្នុងចមណោម ទាហាន១៨ នាក់របស់អាមេរិក បានឡើងយន្តហោះចាកចេញពីទីក្រុងកាប៊ុល។ តាមការប្រកាសរបស់កម្លាំងទាហានអាមេរិក នៅលើបណ្តាញសង្គមTwitter បង្ហាញឲ្យឃើញថា មេទ័ពផ្កាយពីរ លោក Chris Donahueមេបញ្ជាការកម្លាំងទាហានអាកាសលេខ ៨២ របស់អាមេរិក បានធ្វើដំណើរឡើងយន្តហោះក្រោយគេបង្អស់ចាកចេញពីអាហ្វហ្គានីស្ថាន។
ឧត្តមសេនីយ៍ Frank McKenzie ប្រធានទីបញ្ចាការអាមេរិកមានប្រសាសន៍ពីទីក្រុងវ៉ាស៊ីនតោនថា អាមេរិកបានបញ្ចប់ ការចាកចេញពីប្រទេសអាហ្វហ្គានីស្ថាននៅវេលាម៉ោង ១៥ និង២៩នាទី ថ្ងៃទី ៣០ខែសីហា (ត្រូវនិងម៉ោង២និង២៩នាទីព្រឹកថ្ងៃទី៣១ខែសីហាពេលវេលានៅកម្ពុជា)។
តាមបណ្តាញព័ត៌មានCNN បានដកស្រង់សំដីអ្នកនាំពាក្យក្រសួងការពារជាតិអាមេរិកលោក John Kirby បានបញ្ជាក់ថា គិតពីខែកក្កដាដល់ថ្ងៃទី ៣០ខែសីហា មានមនុស្សសរុប ១២២ពាន់នាក់បានចាកចេញពីអាហ្វហ្គានីស្ថាន តាមអាកាសយានដ្ឋានអន្តរជាតិទីក្រុងកាប៊ុល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។