នគរបាលព្រហ្មកំរិតស្រាលបញ្ចូនជនសង្ស័យម្នាក់ដែលចាប់ក្មេងប្រុសបង្ខាំងទុក និងគំរាមសម្លាប់ទៅតុលាការ
នៅព្រឹកថ្ងៃទី១២ ខែកញ្ញា ឆ្នាំ២០១៨ លោក ប៊ុន សត្សា នាយការិយាល័យនគរបាលព្រហ្មទណ្ឌកំរិតស្រាលនៃស្នងការដ្ឋាននគរបាលរាជធានីភ្នំពេញ បានប្រាប់ភ្ងាក់ងារសារព័ត៌មានទូរទស្សន៍ អប្សរា ឲ្យដឹងថា កម្លាំងជំនាញរបស់លោក បានធ្វើស្រាវជ្រាវនិងឃាត់ខ្លួនជនសង្ស័យម្នាក់ក្នុងបទល្មើសជាក់ស្តែង ដោយចាប់ឃុំឃាំងក្មេងប្រុសម្នាក់បង្ខាំងទុក គំរាមសំលាប់ កាលពីថ្ងៃទី១០ ខែកញ្ញា ឆ្នាំ២០១៨ នៅចំណុច ផ្ទះជួលគ្មានលេខ ផ្លូវលំ ក្រុម៣ ភូមិផ្សារតូច សង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ ហើយនិងបញ្ចូនខ្លួនមកកាន់តុលាការនាព្រឹកថ្ងៃទី១២នេះ ដើម្បីកាត់ទោសតាមផ្លូវច្បាប់ ។
លោក ប៊ុន សត្សា នាយការិយាល័យនគរបាលព្រហ្មទណ្ឌកំរិតស្រាលបានឲ្យដឹងទៀតថា ក្មេងប្រុសរងគ្រោះឈ្មោះ ពិសី បូរ៉ា អាយុ ១១ ឆ្នាំ ជនជាតិ ខ្មែរ ជាកូនរបស់ដើមបណ្តឹង មាន ឈ្មោះ ហៃ ពៅពិសី ភេទ ប្រុស អាយុ ៣៤ ឆ្នាំ ជនជាតិ ខ្មែរ មុខរបរ កម្មករសំណង់ស្នាក់នៅផ្ទះជួលគ្មានលេខ ផ្លូវលំ ភូមិផ្សារតូច សង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ ។ ចំណែកឯជនសង្ស័យមាន ឈ្មោះ ចាន់ ទិត្យសិទ្ធិ ហៅ ពេជ្រ ភេទ ប្រុស អាយុ ៣១ ឆ្នាំ ជនជាតិ ខ្មែរ មុខរបជាងជួសជុលអគ្គីសនី ស្នាក់នៅភូមិចំការដូង សង្កាត់ច្បារមន ក្រុងច្បារមន ខេត្តកំពង់ស្ពឺ។
ដោយឡែកវត្ថុតាងចាប់យកជាមធ្យោបាយធ្វើសកម្មភាពរួមមាន ម៉ូតូម៉ាកយ៉ាម៉ាហាExciter ពណ៌ ក្រហមខ្មៅកំពង់ចាម១J-៥៥១២ ។ ម៉ូតូម៉ាកPulsaz ពណ៌ខ្មៅ ពាក់ស្លាកលេខ ភ្នំពេញ១-FR-២៦៩១ និងទូរសព្ទ័ដៃម៉ាក Samsung មួយគ្រឿង ។
បច្ចុប្បន្នជនសង្ស័យ និងវត្ថុតាង ពាក់ពន្ធ័ករណីខាងលើ ការិយាល័យកសាងសំណុំរឿង បញ្ជូនទៅសាលាដំបូងរាជធានីភ្នំពេញ ចំណែកកុមារាឈ្មោះ ពិសី បូរ៉ា អាយុ ១១ ឆ្នាំ ជនជាតិ ខ្មែរ ការិយាល័យប្រគល់ជូនឪពុកម្តាយយកទៅគ្រប់គ្រងបន្តវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។