ស្រ្តីម្នាក់ត្រូវរថយន្តបុកស្លាប់នៅតាមផ្លូវទៅអង្គរ ខណៈរថយន្តបង្កបានបើករត់បាត់
កាលពីវេលាម៉ោងប្រមាណជិត៨យប់ ថ្ងៃទី៥ ខែកញ្ញា ឆ្នាំ២០២១ នៅចំណុចអតីតកន្លែងលក់សំបុត្រអង្គរ ផ្លូវចូលទៅអង្គរ ក្នុងឃុំគោកចក ក្រុងសៀមរាប មានករណីគ្រោះថ្នាក់ចរាចរមួយបានកើតឡើង ដោយរថយន្តមិនស្គាល់ម៉ាក បានបុកម៉ូតូមួយគ្រឿងបណ្តាលឲ្យស្រ្តីម្នាក់ស្លាប់នៅនឹងកន្លែង។
ស្រ្តីរងគ្រោះត្រូវគេបញ្ជាក់ថា មានឈ្មោះ ឌិន សាម៉េត អាយុ៥៣ឆ្នាំ រស់នៅសង្កាត់គោកចក ក្រុងសៀមរាប រីឯភាគីរថយន្តបង្ករ បានបើកគេចខ្លួនបាត់ស្រមោល។
បើតាមអ្នកឃើញហេតុការណ៍ថា ករណីគ្រោះថ្នាក់ចរាចរណ៍នេះ គឺស្រ្តីរងគ្រោះបានបើកម៉ូតូតាមផ្លូវឆ្ពោះក្នុងទិសដៅទៅប្រាសាទអង្គរ ចំណែករថយន្តបានបើកបញ្រ្ចាស់ទិសគ្នា ហើយនៅពេលមកដល់កន្លែងកើតហេតុក៏បានជួបគ្រោះថ្នាក់តែម្តង។
បច្ចុប្បន្នសមត្ថកិច្ចកំពុងតែធ្វើកំណត់ហេតុ ដើម្បីធ្វើការស្រាវជ្រាវទៅតាមនីតិវិធី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។