ពេញ១ខែសីហា! សមត្ថកិច្ចបង្ក្រាបករណីបទល្មើសគ្រឿងញៀន ៤៤០ករណី ឃាត់ខ្លួនជនសង្ស័យ ៨៦១នាក់
ភ្នំពេញ៖ ក្នុងប្រតិបត្តិការបង្ក្រាបបទល្មើសគ្រឿងញៀន ក្នុងខែសីហា ឆ្នាំ២០២១ រយៈពេល១ខែពេញនេះ សមត្ថកិច្ចបង្ក្រាបបទល្មើសគ្រឿងញៀនសរុបចំនួន ៤៤០ករណី កើនឡើង១១១ករណី ស្មើនឹង៣៣,៧ភាគរយ ធៀបនឹងខែកក្កដា ឆ្នាំ២០២១។ ករណីល្មើសដែលបង្ក្រាបបានទាំងនោះរួមមាន ករណីរក្សាទុកជួញដូរ និងរក្សាទុកមានចំនួន៣៥៥ករណី, ករណីប្រើប្រាស់មានចំនួន៨៤ករណី និងករណីសំយោគកែច្នៃ១ករណី។
កិច្ចប្រតិបត្តិការនេះដែរ សមត្ថកិច្ច បានឃាត់ខ្លួនជនសង្ស័យចំនួន ៨៦១នាក់ កើនឡើង១២នាក់ ធៀបនឹងខែកក្កដា ឆ្នាំ២០២១ ស្មើនឹង១,៤ភាគរយ។ ក្នុងចំណោមជនសង្ស័យទាំនោះ រួមមាន៖ ករណីជួញដូរ និងរក្សាទុកមានចំនួន ៦៥០នាក់, ករណីប្រើប្រាស់គ្រឿងញៀន ២១០នាក់ និងករណីសំយោគ កែច្នៃ មាន១នាក់ និងមានជនបរទេស ២១នាក់។
ចំណែកគ្រឿងញៀន សមត្ថកិច្ចចាប់យកគ្រឿងញៀនសរុបចំនួន ៥៧គីឡូក្រាម និង៩១២,៥៤ក្រាម ធៀបនឹងខែកក្កដា ចាប់បានជិត ២២០គីឡូក្រាម។ គ្រឿងញៀនដែលចាប់បាន ក្នុងខែសីហា រួមមាន៖ មេតំហ្វេតាមីនក្រាមម្ស៉ៅជាង ៣៧គីឡូក្រាម, មេតំហ្វេតាមីនគ្រាប់ជា ៣៥គីឡូក្រាម, អ៊ិចស្ត្រាស៊ីជាង១២គីឡូក្រាម, កេតាមីនជាង ៧គីឡូក្រាម, Ninetazepamជាង២០០ក្រាម និងកញ្ឆាស្ងួតជាង ១គីឡូក្រាម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។