អាមេរិក នឹងអនុញ្ញាតឲ្យភ្ញៀវទេសចរបរទេស ដែលចាក់វ៉ាក់សាំងកូវីដរួច ចូលក្នុងប្រទេសខ្លួន
វ៉ាស៊ីនតោន៖ ប្រធានាធិបតីអាមេរិកលោក ចូ បៃដិន គ្រោងនឹងតម្រូវឱ្យអ្នកទេសចរបរទេសត្រូវចាក់វ៉ាក់សាំងបង្ការជំងឺកូវីដ១៩ឱ្យបានពេញលេញ ដើម្បីអាចចូលមកសហរដ្ឋអាមេរិកបាន។ រដ្ឋបាលលោក បៃដិន បានប្រកាសផែនការខាងលើនេះ កាលពីថ្ងៃចន្ទម្សិលមិញ។
នៅក្រោមគោលនយោបាយថ្មីដែលនឹងចាប់ផ្តើមនៅដើមខែវិច្ឆិកាខាងមុខនេះ ជនបរទេសពេញវ័យដែលហោះហើរទៅសហរដ្ឋអាមេរិកត្រូវទទួលថ្នាំបង្ការឱ្យបានពេញលេញ និងបង្ហាញភស្តុតាងនៃការចាក់វ៉ាក់សាំងមុនពេលឡើងយន្តហោះ។ ពួកគេនឹងត្រូវទទួលបានការធ្វើតេស្តរកវីរុសកូវីដ១៩អវិជ្ជមានក្នុងរយៈពេលបីថ្ងៃនៃការចាកចេញ។
ទាក់ទងនឹងម៉ាកវ៉ាក់សាំង ដែលមិនត្រូវបានអនុញ្ញាតឱ្យប្រើប្រាស់នៅសហរដ្ឋអាមេរិកនោះ រដ្ឋបាលបាននិយាយថាមជ្ឈមណ្ឌលគ្រប់គ្រង និងបង្ការជំងឺឆ្លងអាមេរិក (CDC) នឹងកំណត់ថាតើវ៉ាក់សាំងណាដែលនឹងត្រូវទទួលយកក្រោមគោលនយោបាយថ្មីនេះ។
សហរដ្ឋអាមេរិកបានហាមឃាត់មិនឱ្យជនបរទេសដែលមកពីបណ្តាប្រទេសមួយចំនួនចូលមកក្នុងប្រទេសខ្លួន ក្នុងនោះរួមទាំងប្រទេសជាច្រើននៅអឺរ៉ុប ចិន និងឥណ្ឌាក្នុងរយៈពេល១៤ថ្ងៃ។ ប៉ុន្តែពួកគេនឹងត្រូវបានអនុញ្ញាតឱ្យចូល ប្រសិនបើពួកគេត្រូវបានចាក់វ៉ាក់សាំងពេញលេញ។
ការរឹតបន្តឹងការធ្វើដំណើររបស់អាមេរិកមិនសូវតឹងរ៉ឹង ចំពោះអ្នកដែលធ្វើដំណើរមកពីប្រទេសជប៉ុនទេ ដោយគ្រាន់តែត្រូវការភស្តុតាងនៃការធ្វើតេស្តអវិជ្ជមាន។ ប៉ុន្តែក្រោមគោលនយោបាយថ្មីនេះ ពួកគេក៏នឹងត្រូវចាក់វ៉ាក់សាំងបង្ការឱ្យបានពេញលេញផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។