អាមេរិក គ្រោងអនុញ្ញាតឲ្យប្រើវ៉ាក់សាំង Covid-19 ដូសជំរុញបន្ថែមទៀត
វ៉ាស៊ីនតោន៖ រដ្ឋបាលឱសថ និងចំណីអាហារអាមេរិក (FDA) មានផែនការចេញការអនុញ្ញាតអោយប្រើប្រាស់វ៉ាក់សាំងបង្ការជំងឺកូវីដ១៩ដូសជំរុញ ឬដូសទី៣ប្រភេទផ្សេងគ្នា បន្ថែមពីលើវ៉ាក់សាំងតែមួយម៉ាក ដែលត្រូវបានអនុម័តអោយប្រើកាលពីលើកមុន នេះបើតាមកាសែត New York Times។
សេចក្តីរាយការណ៍បន្ថែមពីកាសែត New York Times បានអោយដឹងទៀតថា អាជ្ញាធរសុខាភិបាលអាមេរិកទំនងជាមិនណែនាំឲ្យប្រើប្រាស់វ៉ាក់សាំងដូសទី៣ ឬ ដូសជំរុញ ខុសពីម៉ាកវ៉ាក់សាំងដែលពលរដ្ឋបានចាក់កាលពីលើកមុននោះឡើយ ហើយការសម្រេចចិត្តនាពេលខាងមុខនេះ ទំនងជានឹងណែនាំឲ្យពលរដ្ឋ ចាក់វ៉ាក់សាំងដូសជំរុញ ឬ ដូសទី ៣ ឲ្យស្របទៅនឹងម៉ាកវ៉ាក់សាំង ដែលពួកគេបានចាក់កាលពីដំបូង។
រដ្ឋបាលឱសថ និងចំណីអាហារអាមេរិក (FDA) កាលពីខែកញ្ញាកន្លងទៅ បានអនុម័តឲ្យប្រើវ៉ាក់សាំងដូសទី ៣ របស់ក្រុមហ៊ុន Pfizer-BioNTech សម្រាប់ពលរដ្ឋអាមេរិកដែលមានអាយុ ៦៥ ឆ្នាំឡើងទៅ និងអ្នកដែលត្រូវបានចាត់ទុកថា ស្ថិតនៅក្នុងហានិភ័យខ្ពស់នៃការឆ្លងជំងឺកូវីដ១៩។
ហើយឥឡូវនេះ ក្រុមប្រឹក្សាយោបល់របស់រដ្ឋបាលឱសថ និងចំណីអាហារអាមេរិក (FDA) បានគាំទ្ររួចហើយ ចំពោះការប្រើប្រាស់វ៉ាក់សាំងដូសទី ៣ ឬដូសជំរុញរបស់ក្រុមហ៊ុន Moderna និង Johnson & Johnson ហើយពួកវានឹងត្រូវអនុម័តអោយប្រើជាផ្លូវការនាពេលខាងមុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។