កូរ៉េខាងជើងបន្តសាកល្បងមីស៊ីលពីរគ្រាប់ ខណៈអាមេរិកអំពាវនាវឲ្យវិលត្រឡប់មកពិភាក្សាវិញ
មន្ត្រីអាមេរិកទទួលបន្ទុកកិច្ចការកូរ៉េខាងជើង បានលើកឡើងថា អាមេរិកបានត្រៀមលក្ខណពិភាក្សាជាមួយកូរ៉េខាងជើងគ្រប់ពេលវេលាគ្រប់ទីកន្លែង ដោយមិនមានលក្ខខណ្ឌណាមួយនោះឡើយ។
នៅថ្ងៃទី ១៩ខែតុលា កូរ៉េខាងជើងបានបាញ់មីស៊ីលចូលទៅកាន់ដែនសមុទ្រប្រទេសជប៉ុន ។ សារព័ត៌មានយ៉ុងហាប់របស់កូរ៉េខាងត្បូង បានដកស្រង់ប្រភពព័ត៌មានពីទីបញ្ជាការកងកម្លាំងសម្ព័ន្ធមិត្តអាមេរិក-កូរ៉េខាងត្បូង បានបញ្ជាក់ថា កូរ៉េខាងជើងពិតជាបានបាញ់មីស៊ីលឆ្លងទ្វីបចូលទៅកាន់ដែនសមុទ្រជប៉ុន ប៉ុន្តែមិនបានបញ្ជាក់ថាមីស៊ីលប្រភេទណានោះឡើយ។
ក្នុងពេលជាមួយគ្នានេះដែរ សារព័ត៌មានក្យូដូ របស់ជប៉ុនបានផ្សាយថា នាយករដ្ឋមន្ត្រីជប៉ុនលោក Fumio Kishida បានមានប្រសាសន៍ថា កូរ៉េខាងជើងបានបាញ់មីស៊ីលពីរគ្រាប់ចូលទៅកាន់ដែនសមុទ្រជប៉ុន។ តាមប្រភពព័ត៌មាន នៅពេលនេះមិនទាន់មានរបាយការណ៍បញ្ជាក់ពីការខូចខាតដោយសារតែការបាញ់មីស៊ីលនោះឡើយ អាចប៉ះពាល់ដល់ក្រុមអ្នកនេសាទ ឬឆ្មាំការពារដែនសមុទ្រដែរឬទេ។
សារព័ត៌មាន យ៉ុងហាប់បានផ្សាយថា កូរ៉េខាងជើងបានបាញ់មីស៊ីលពីរគ្រាប់ ចេញពីទីតាំង Sinpo ស្ថិតនៅក្នុងខេត្តHamgyong នៅវេលាម៉ោង ១០និង១៧នាទី(ពេលវេលាក្នុងតំបន់)។ នៅពេលនេះដែរ ក្រុមចារកិច្ចអាមេរិកនិងកូរ៉េខាងត្បូង កំពុងតែវាយតម្លៃ ពីបញ្ហាខាងលើ។
នេះជាលើកទីពីរហើយក្នុងរយៈពេលមួយខែកន្លងមក ដែលកូរ៉េខាងជើង បានបាញ់សាកល្បងមីស៊ីល។ កាលពីថ្ងៃទី ១៥ខែកញ្ញា កូរ៉េខាងជើងបានបាញ់សាកល្បងមីស៊ីលចេញពីរថភ្លើង ដែលជាជំហានថ្មីក្នុងយុទ្ធសាស្ត្រយោធារបស់កូរ៉េខាងជើង ក្នុងគោលដៅការពារនិងទប់ស្កាត់ការវាយប្រហារពីសត្រូវ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។