អឺរ៉ុប សន្យាថាបន្តជួយវៀតណាម លើកិច្ចការវ៉ាក់សាំង!
សហគមអឺរ៉ុបនឹងបន្តផ្តល់វ៉ាក់សាំងកូវីដ១៩ ជូនដល់ប្រទេសវៀតណាម មិនថា តាមរយៈកុងត្រាពាណិជ្ជកម្ម ឬ យន្តការកូវ៉ាក់ទេ នេះបើតាមគណៈកម្មការអឺរ៉ុបហៅកាត់ថា EC ចេញផ្សាយដោយទីភ្នាក់ងារព័ត៌មានវៀតណាម VNexpress កាលពីថ្ងៃទី២ វិច្ឆិកា។
ប្រភពថា ការសន្យានេះធ្វើឡើង ក្នុងពេលប្រធានគណៈកម្មការអឺរ៉ុបលោកស្រី Ursula von der Leyen ទទួលជួបលោកនាយករដ្ឋមន្ត្រីវៀតណាម Pham Minh Chinh នៅក្រៅសន្និសីទអន្តរជាតិរបស់អង្គការសហប្រជាជាតិទាក់ទងនឹងបញ្ហាប្រែប្រួលអាកាសធាតុ ហៅកាត់ថា COP26 នៅប្រទេសស្កត់ឡែន ថ្មីៗនេះ។
លោកស្រី បានគូសបញ្ជាក់ថា អឺរ៉ុបនឹងបន្តជួយគាំទ្រកិច្ចការវ៉ាក់សាំងដល់ប្រទេសវៀតណាម តាមរយៈការនាំចូល ឬ យន្តការ Covax ខណៈដែលលោកនាយករដ្ឋមន្ត្រីបង្ហាញការសង្ឃឹមថា វ៉ាក់សាំងនិងសម្ភារៈបរិក្ខាបន្ថែមទៀត នឹងបញ្ជូនទៅដល់វៀតណាម។
វៀតណាម ទទួលបានវ៉ាក់សាំង ១០៧លានដូសហើយ គិតត្រឹមថ្ងៃទី២៩ តុលា ខណៈដែលមនុស្សជាង២៤លាននាក់ហើយដែលបានចាក់វ៉ាក់សាំងដូសទី២៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។