ប្រទេសជាច្រើន នឹងបញ្ឈប់ការប្រើប្រាស់ធ្យូងថ្ម នៅឯសន្និសីទកំពូល COP26
ប្រទេសប៉ូឡូញ, វៀតណាម, ស៊ីលី និងប្រទេសជាច្រើនទៀតគ្រោងសន្យាថា នឹងបញ្ឈប់ការប្រើប្រាស់ថាមពលធ្យូងថ្មបន្តិចម្ដងៗ នៅ ក្រោមកិច្ចព្រមព្រៀងមួយដែលនឹងធ្វើឡើងនៅឯសន្និសីទកំពូលស្ដីពីការប្រែប្រួលអាកាសធាតុ COP26 នៅឯទីក្រុង ក្លាសហ្គូវ (Glasgow) ប្រទេសស្កុតលែន នាថ្ងៃទី៤ វិច្ឆិកានេះ។ ការប្រកាសពីព័ត៌មានខាងលើធ្វើឡើងដោយរដ្ឋាភិបាលចក្រភពអង់គ្លេស ដែលជាម្ចាស់ផ្ទះរៀបចំសន្និសីទកំពូលស្ដីពីការប្រែប្រួលអាកាសធាតុ COP26។
បើតាមរដ្ឋាភិបាល ចក្រភពអង់គ្លេស បណ្ដាប្រទេសជាហេត្ថលេខីនៃកិច្ចព្រមព្រៀង COP26 អាចនឹងធ្វើការប្ដេជ្ញាចិត្ត ក៏ដូចជាសន្យាថាបញ្ឈប់ការវិនិយោគលើគម្រោងសាងសង់រោងចក្រថាមពលធ្យូងថ្មថ្មីៗទាំងនៅក្នុងស្រុក និងនៅក្រៅប្រទេស ហើយមិនតែប៉ុណ្ណោះពួកគេក៏នឹងសន្យាផងដែរថាឈប់ប្រើប្រាស់ធ្យូងថ្មផលិតថាមពលបន្តិចម្ដងៗ នៅត្រឹមទសវត្សរឆ្នាំ២០៣០ សម្រាប់បណ្ដាប្រទេសអ្នកមាន និងត្រឹមឆ្នាំ២០៤០ សម្រាប់បណ្ដាប្រទេសក្រីក្រ។
គួរបញ្ជាក់ថា ធ្យូថ្មគឺជាឥន្ធនៈផូស៊ីលដែលបំពុលបរិយាកាសខ្លាំងបំផុត ហើយក៏ជាមូលហេតុចម្បងនៃការបញ្ចេញឧស្ម័នផ្ទះកញ្ចក់ ដែលធ្វើឱ្យផែនដីឡើងកម្ដៅដែរ។ ដូច្នេះ ការបញ្ឈប់ការប្រើប្រាស់ធ្យូងថ្មនៅទូទាំងពិភពលោក ជាគោលដៅដ៏សំខាន់សំដៅសម្រេចឱ្យបាននូវកិច្ចព្រមព្រៀងអាកាសធាតុជាសកល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។