ការបើកដំណើរការខារ៉ាអូខេ ឌីស្កូថេក និងរង្គសាល គឺត្រូវរង់ចាំក្រោយថ្ងៃទី៣០ វិច្ឆិកា

ថ្លែងក្នុងពិធីបើកសម្ពោធជាផ្លូវការ អគារទីស្តីការក្រសួងរៀបចំដែនដី នគរូបនីយកម្ម និងសំណង់ នៅព្រឹកថ្ងៃទី៨ ខែមីនា សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា បានមានប្រសាសន៍ថា អាជីវកម្មដែល មានហានិភ័យខ្ពស់ ដូចជា ខារ៉ាអូខេ ឌីស្កូថេក និងរង្គសាល ពេលនេះ​មិនទាន់អនុញ្ញាត​ឲ្យ​បើក​ឡើងវិញ​ទេ ដោយ​ត្រូវរង់ចាំរហូតដល់ថ្ងៃទី៣០ ខែវិច្ឆិកា ឆ្នាំ២០២១។

សម្តេចតេជោ បន្តថា ការសម្រេចបើកប្រទេសឡើងវិញជាបណ្តើរៗលើគ្រប់វិស័យនេះ គឺដោយសារតែប្រជាពលរដ្ឋគ្រប់ៗគ្នាស្ម័គ្រចិត្តទៅទទួលការ ចាក់វ៉ាក់សាំងយ៉ាងត្រឹមត្រូវនិងពេញលេញ ហើយបានស៊ូទ្រាំការលំបាកកាលពីមុនជាមួយគ្នា ទើបពេលនេះរាជរដ្ឋាភិបាលកម្ពុជា អាចបើកដំណើរប្រទេសឡើងវិញស្ទើរគ្រប់វិស័យ ។

« នេះហើយទើបយើងបើកប្រទេសឡើងវិញ គឺកំពុងតែបើកហើយ ប៉ុន្តែសម្រាប់ខារ៉ាអូខេ KTV ឌីស្កូថេក ហើយនិងរង្គសាល គឺរង់ចាំក្រោយថ្ងៃទី៣០ ខែវិច្ឆិកា ខ្ញុំសម្រេចយប់មិញតាមសំណើ របស់ឯកឧត្តម អូន ព័ន្ធមុនីរ័ត្ន បានដឹកនាំប្រជុំដោយ ឯកឧត្តម ម៉ម ប៊ុនហេង ពីគណៈកម្មការ ពីព្រោះបើសិនជាបើកកន្លែងទាំងនេះលឿនពេក គឺអាចនឹងមានការឆ្លង ដូច្នេះធ្វើយ៉ាងណាគឺត្រូវឱ្យសាលាបើកទៅមុនសិន អត្រាឆ្លងគឺមានការធ្លាក់ចុះ បើក សាលាមនុស្សជាង ៣លាននាក់បានចូលរៀន តែឆ្លងមានកម្រិតតូចតាច ដោយសារមកពីបងប្អូនព្រមទទួលយកវ៉ាក់សាំង ក្នុងពេលដែលពួកអ្នកដទៃប្រឆាំងការចាក់វ៉ាក់សាំង ការចាក់វ៉ាក់សាំងគឺជាការសង្គ្រោះជីវិតមនុស្ស ប្រសិនបើបងប្អូនមិនទទួលបានវ៉ាក់សាំងទេច្បាស់ជាមកដល់ពេលនេះបើកប្រទេសមិនរួចទេ ដូច្នេះពេលមុនបងប្អូនទ្រាំទ្រការលំបាក តែពេលនេះបងប្អូនបានធូរស្រាលហើយ ក្នុងមួយអាទិត្យនេះគឺខ្ញុំតាមដានគឺឃើញថា បងប្អូនមានការសប្បាយចិត្តនៅពេលដែលយើងបានបើកប្រទេសឡើងវិញ » ។

ជាមួយគ្នានេះដែរសម្តេចតេជោ ហ៊ុន សែន បានបង្ហាញអារម្មណ៍ សប្បាយរីករាយ ក្នុងពេលដែលសង្កេតឃើញថា ប្រជាពលរដ្ឋទាំងអស់បានប្រកានខ្ជាប់ខ្ជួននូវវិធានការសុខាភិបាល ជាពិសេសអនុវត្តវិធានការ ៣កុំនិង៣ការពារ យ៉ាងខ្ជាប់ខ្ជួនជាទីបំផុត ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។