សុំស្រឡាញ់កូនមេជាងមិនបាន យកកាំភ្លើងច្នៃបាញ់សម្លាប់ខាងស្រី រួចបាញ់ខ្លួនឯងតាមក្រោយ
(កំពង់ធំ) ៖ ស្រ្តី និងបុរសពីរនាក់បានស្លាប់យ៉ាងអណោចអធ័ម កាលពីវេលាម៉ោងប្រមាណ១២ និង៣០នាទីថ្ងៃត្រង់ ថ្ងៃទី០៧ ខែមីនា ឆ្នាំ២០២២ នៅចំណុចផ្ទះជួសជុលម៉ូតូមួយកន្លែងស្ថិតនៅភូមិត្រពាំងចំបក់ ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ។
បើតាមការបញ្ជាក់ពីលោក កែ កញ្ចនា អធិការស្រុកកំពង់ស្វាយបានឲ្យដឹងថា ឃាតកម្មនេះបានបណ្តាលឲ្យមនុស្សស្លាប់ចំនួន ២ នាក់គឺ ១.ឈ្មោះ គង់ គឹមហ័ន ភេទស្រីអាយុ៣១ឆ្នាំ រស់នៅភូមិកើតហេតុ(ស្លាប់កន្លែងកើតហេតុ)បាញ់ត្រូវគល់កឆ្វេងបែកក្បាល០១គ្រាប់ និង ២.ជនបង្កឈ្មោះ សុខ សូយ៉ន ហៅឌី រស់នៅភូមិតស៊ូ ឃុំតស៊ូ ស្រុកជ័យសែន ខេត្តព្រះវិហារ (បាញ់សម្លាប់ខ្លួនបែកលលាដ៏ក្បាល)។
លោកបានបញ្ជាក់ទៀតថា មុនកើតហេតុ ជនបង្កបានមកសុំរៀនធ្វើជាងជួសជុលធ្វើម៉ូតូរយ:ពេល១ឆ្នាំ ហើយចុងក្រោយប្រហែលបីខែនេះ ជនបង្កបានស្រលាញ់ជនរងគ្រោះតែជនរងគ្រោះ (កូនមេជាង) មិនព្រមស្រលាញ់ទេ។ លុះថ្ងៃទី០២ ខែមីនា ឆ្នាំ២០២២ ជនបង្កបានទៅលេងផ្ទះខ្លួនដោយដេក១យប់រួចត្រឡប់មកវិញ រហូតដល់ថ្ងៃកើតហេតុទើបជនបង្កបានយកកាំភ្លើងកែឆ្នៃបាញ់សម្លាប់ជនរងគ្រោះ រួចបាញ់សម្លាប់ខ្លួនឯងតែម្តង។
ក្រោយកើតហេតុសមត្ថកិច្ចបានពិនិត្យកន្លែងកើតហេតុ និងបានរកឃើញអាវុធខ្លីកែឆ្នៃចំនួន០២ដើម។ រីឯសពទាំងពីបានប្រគល់សាច់ញ្ញាតិធ្វើបុណ្យតាមប្រពៃណី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។