បទចម្រៀង «អ្នកចម្បាំង» សម្រិតសម្រាំងរួចរាល់ និងគ្រោងផ្សព្វផ្សាយមុនបុណ្យចូលឆ្នាំ
បទចម្រៀង «អ្នកចម្បាំង» ដែលបានបង្ហាញលើក ដំបូងក្នុងកម្មវិធីសម្ពោធពហុកីឡាជាតិ មរតកតេជោ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គ មហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ពេលនេះត្រូវបានផលិតជា MV រួចរាល់ក្រោមការសម្រិត សម្រាំងយ៉ាងល្អបំផុត ដែលនឹងផ្សព្វផ្សាយតាមប្រព័ន្ធផ្សព្វ ផ្សាយនានា នៅថ្ងៃទី៩ ខែមេសា ឆ្នាំ២០២២ ពោលគឺមុនបុណ្យចូលឆ្នាំប្រពៃណីជាតិឈានចូលមកដល់។
លោក សេង ចំណាន អគ្គនាយកផលិតកម្មរាមបានឲ្យដឹងថា ការផលិតបទចម្រៀងនេះឡើង គឺកើតចេញពីទឹកចិត្តភក្តីភាពសម្រាប់គុនល្បុក្កតោ ដែលជាស្នាដៃបង្កើតដោយបុព្វបុរសខ្មែរ ដូចនេះ ការផលិតក៏ត្រូវតែយកចិត្តទុកដាក់បំផុត ដើម្បីឲ្យសមជាស្នាដៃរបស់កូនខ្មែរ។
បទអ្នកចម្បាំងផលិតឡើងក្នុងគោលបំណងលើកតម្កើងក្នុងការផ្សព្វផ្សាយបង្អួតទៅអន្តរជាតិ។បទចម្រៀងអ្នកចម្បាំង បានផ្តិតយករូបភាព និងសកម្មភាពដ៏កម្រពីក្បាច់គុនល្បុក្កតោ ហើយក៏ជាសារមួយ សម្រាប់ យុវជនខ្មែរឲ្យងាកមកចាប់អារម្មណ៍លើប្រពៃណីទំនៀមទម្លាប់វប្បធម៌កីឡាក្បាច់គុនល្បុក្កតោ ដែលជាមោទនភាពជាតិ។
លោក អ៊ួ តារា អគ្គលេខាធិការរង សហព័ន្ធកីឡាគុនល្បុក្កតោកម្ពុជា និងជាអ្នកដឹកនាំផលិតបានបញ្ជាក់ដែរថាដោយមានការគាំទ្រយ៉ាងពេញទំហឹងពីគណៈកម្មការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) និងបានការសម្របសម្រួលពីអាជ្ញាធរជាតិអប្សារាបានធ្វើឲ្យការផលិតនេះទទួលបានលទ្ធផលល្អ។ យើងត្រូវបង្ហាញពីសក្តានុពលកីឡាប្រពៃណីជាតិ និង ដំណើរឆ្ពោះធ្វើម្ចាស់ផ្ទះ ការប្រកួតកីឡា ស៊ីហ្គេម លើកទី៣២ ឆ្នាំ២០២៣ ជាប្រវត្តិសាស្ត្រដំបូងរបស់ ព្រះរាជាណាចក្រកម្ពុជា។ «យើងសង្ឈឹមថា បទចម្រៀងនេះនឹងនាំមកនូវមោទនភាពជាតិ និងពង្រឹងស្មារតីដល់កីឡាករ កីឡាការនីឲ្យកាន់តែរឹងមាំ ប្រៀបបាននឹងអ្នកចម្បាំងសម័យអង្គរ»៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។