អាវុធអាមេរិកជាច្រើន បញ្ជូនទៅកាន់អ៊ុយក្រែន បាត់ស្រមោលឈឹង
សារព័ត៌មាន CNN នៅថ្ងៃទី ១៩ខែមេសា បានដកស្រង់ប្រភពព័ត៌មានពីក្រុមចារកម្មអាមេរិកបានឲ្យដឹងថា អាវុធជាច្រើនរបស់អាមេរិក បានផ្ញើទៅកាន់ប្រទេសអ៊ុយក្រែន បាត់ស្រមោលឈឹងមិនអាចតាមដានបានថាតើអាវុធទាំងនោះទៅទីណាឡើយ។
ប្រភពព័ត៌មានពីក្រុមចារកិច្ចអាមេរិកបានឲ្យដឹងថា «យើងអាចតាមដានបានតែក្នុងរយៈពេលខ្លីប៉ុណ្ណោះ ហើយក្នុងពេលដែល អាវុធទាំងនោះចូលទៅដល់តំបន់គ្រប់ដណ្តប់ដោយផ្សែងនៃសង្គ្រាម គឺយើងមិនអាចតាមដានបាននោះឡើយ បាត់សញ្ញាតែម្តង។ មន្ត្រីចារកិច្ចអាមេរិក បានប្រាក់សារព័ត៌មាន CNN ថា «អាវុធទាំងនោះដូចជាបានធ្លាក់ចូលក្នុង រណ្តៅខ្មៅដ៏ធំមួយ ធ្វើឲ្យយើងបាត់សញ្ញាតាមដានតែម្តង។
ជាមួយគ្នានេះដែរ រដ្ឋាភិបាលរបស់ប្រធានាធិបតីចូបៃឌិន ក៏បានប្រកាសថា អាវុធដែលអាមេរិកផ្តល់ទៅឲ្យអ៊ុយក្រែន អាចធ្លាក់ចូលក្នុងដៃ ក្រុមទាហានផ្តាច់ខ្លួននៅក្នុងប្រទេសអ៊ុយក្រែន។ តាមសារព័ត៌មាន CNN ដោយសារតែមិនមានទាហានអាមេរិកនៅក្នុងទឹកដីអ៊ុយក្រែន ព័ត៌មានទាំងឡាយដែលទីក្រុងវ៉ាស៊ីនតោនទទួលគឺពឹងផ្អែកទៅលើទីក្រុងគៀវទាំងអស់ ។
កាលពីថ្ងៃទី១៨ខែមេសា អ្នកនាំពាក្យក្រសួងការបរទេសរុស្ស៊ី លោកIgor Konashe បានប្រកាសថា អាវុធមួយចំនួនធំ ដែលអាមេរិក អឺរ៉ុប ផ្ញើទៅឲ្យអ៊ុយក្រែន ក្នុងរយៈពេល៦ថ្ងៃកន្លងមក រងការបំផ្លាញ ដោយមីស៊ីលរបស់រុស្ស៊ី ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។