កម្ពុជា-អូស្ត្រាលី បើកកិច្ចសន្ទនាតុមូល ពិភាក្សាអំពីកាលានុវត្តភាពវិនិយោគ និងបញ្ហាប្រឈមនានា សំដៅរួមគ្នារកវិធីដោះស្រាយ!
ភ្នំពេញ៖ កាលពីថ្ងៃទី២៨ ខែ មេសា ឆ្នាំ២០២២ ឯកឧត្តម នុត អ៊ុនវ័ណរ៉ា អគ្គលេខាធិការរងគណៈកម្មាធិការវិនិយោគកម្ពុជា តំណាងឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា (ក.អ.ក.) បានអញ្ជើញចូលរួមជាអធិបតីក្នុងកិច្ចសន្ទនាតុមូល កម្ពុជា-អូស្ត្រាលី ស្តីពីការវិនិយោគ នៅសណ្ឋាគារ ហៃយ៉ាត់ រីជិនស៊ី ភ្នំពេញ ដែលសហការរៀបចំឡើងដោយស្ថានទូតអូស្ត្រាលីប្រចាំកម្ពុជា និង ក.អ.ក.។
កិច្ចសន្ទនានេះមានការអញ្ជើញចូលរួមពីសំណាក់លោក Andreas Zurbrugg ឯកអគ្គរាជទូតរងអូស្ត្រាលីប្រចាំកម្ពុជា, តំណាងក្រសួង ស្ថាប័នចំនួន ១២ របស់រាជរដ្ឋាភិបាលកម្ពុជា, វិនិយោគិនអូស្ត្រាលីដែលកំពុងមានសកម្មភាពវិនិយោគនៅកម្ពុជាដែលបានចូលរួមដោយផ្ទាល់ និងតាមប្រព័ន្ធវីដេអូ សរុបចំនួនប្រមាណ ៦០រូប។
ឯកឧត្តម នុត អ៊ុនវ័ណរ៉ា បានលើកឡើងថា គោលបំណងនៃកិច្ចសន្ទនាតុមូល គឺដើម្បីផ្តល់ឱកាសជូនវិនិយោគិន និងមន្ត្រីតំណាងក្រសួងស្ថាប័នពាក់ព័ន្ធរបស់រាជរដ្ឋាភិបាលកម្ពុជា ជួបពិភាក្សាអំពីកាលានុវត្តភាពវិនិយោគ និងបញ្ហាប្រឈមនានា សំដៅរួមគ្នារកវិធីដោះស្រាយ។ កិច្ចពិភាក្សាក្នុងកិច្ចសន្ទនាតុមូលនាពេលនេះ ក៏នឹងក្លាយជាមូលដ្ឋាននៃការរៀបចំសៀវភៅស្តីពីឧត្តមានុវត្តន៍សម្រាប់កិច្ចសម្រួលវិនិយោគនៅកម្ពុជា ដែលគម្រោងនេះគាំទ្រដោយរដ្ឋាភិបាលអូស្ត្រាលីផងដែរ។
ឯកឧត្តម បានជម្រាបជូនអំពីកិច្ចខិតខំប្រឹងប្រែង និងភាពជោគជ័យរបស់រាជរដ្ឋាភិបាលកម្ពុជាក្នុងការទប់ស្កាត់ការរីករាលដាលនៃជំងឺកូវីដ-១៩ ដែលអាចអនុញ្ញាតឱ្យមានការជួបប្រាស្រ័យគ្នាដោយផ្ទាល់ក្នុងកិច្ចសន្ទនាតុមូលនាពេលនេះ។ កត្តានេះ បានបង្ហាញថាកម្ពុជាជាប្រទេសមានសុវត្ថិភាព បានបើកទ្វារ និងរង់ចាំទទួលស្វាគមន៍ការវិនិយោគ។
ឆ្លៀតក្នុងឱកាសនេះដែរ ឯកឧត្តម បានសម្តែងនូវអំណរគុណដល់រដ្ឋាភិបាលប្រទេសអូស្ត្រាលី និងស្ថានទូតអូស្ត្រាលីនៅកម្ពុជា ដែលបានផ្តល់ការគាំទ្រដល់កិច្ចខិតខំប្រឹងប្រែងរបស់ កម្ពុជាក្នុងការជំរុញនិងទាក់ទាញវិនិយោគ និងការចូលរួមកសាងនិងលើកកម្ពស់សមត្ថភាពមន្ត្រីដែលមានភារកិច្ចពាក់ព័ន្ធនឹងកិច្ចការវិនិយោគនាពេលកន្លងមក និងនាពេលខាងមុខនេះ។
គួររំលឹកផងដែរថា ឆ្នាំនេះជាខួបលើកទី៧០នៃទំនាក់ទំនងការទូតរវាងកម្ពុជា និងអូស្ត្រាលី ហើយកិច្ចការដែលយើងអនុវត្តរួមគ្នានាពេលនេះ មិនត្រឹមតែបានចូលរួមពង្រឹងដល់ចំណងមិត្តភាព និងទំនាក់ទំនងការទូតប៉ុណ្ណោះទេ ប៉ុន្តែក៏នឹងចូលរួមពង្រឹងដល់ទំនាក់ទំនងសេដ្ឋកិច្ច ពាណិជ្ជកម្ម និងវិនិយោគរវាងប្រទេសទាំងពីរផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។