កីឡាការិនី ខាន់ ចេសា ត្រៀមចូលរួមប្រកួតប្រជែងមេដាយ ការប្រកួតកីឡាស៊ីហ្គេម លើកទី៣១ នៅប្រទេសវៀតណាម
លោក ប៉ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡា តំណាងដ៏ខ្ពង់ខ្ពស់ឯកឧត្តម អ៊ុក សិទ្ធិជាតិ អគ្គនាយក អគ្គនាយកដ្ឋានកីឡានៃក្រសួងអប់រំ យុវជន និងកីឡាបានអញ្ជើញទទួលស្វាគមន៍យ៉ាងកក់ក្តៅដំណើរមកដល់របស់កីឡាការិនីជឺជីតស៊ូជម្រើសជាតិកម្ពុជា ខាន់ ចេសា និងឪពុករបស់នាង គឺលោក Peter Khan រួមទាំងម្តាយបង្កើតរបស់លោកផងដែរ នៅអាកាសយានដ្ឋានអន្តរជាតិភ្នំពេញ នៅព្រឹកថ្ងៃទី៥ឧសភានេះ។
ការមកដល់របស់កីឡាការិនីដ៏ឆ្នើមកូនកាត់ខ្មែរ-អាម៉េរិក ខាន់ ចេសា គឺដើម្បីត្រៀមចូលរួមប្រកួតប្រជែងមេដាយ ការប្រកួតកីឡា ស៊ីហ្គេម លើកទី៣១ នៅប្រទេសវៀតណាម ដែលគ្រោងនឹងធ្វើឡើងនាថ្ងៃទី១២-២៣ ខែឧសភា ឆ្នាំ២០២២។
កីឡាការិនីជឺជីតស៊ូកម្ពុជា ខាន់ ចេសា គឺជាអតីតម្ចាស់មេដាយមាស កីឡាអាស៊ី (ASIAN GAMES) នៅប្រទេសឥណ្ឌូណេស៊ី ឆ្នាំ២០១៨ និងជាម្ចាស់មេដាយមាសកីឡាស៊ីហ្គេម លើកទី៣០ កាលពីឆ្នាំ២០១៩ នៅប្រទេសហ្វីលីពីន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។