រដ្ឋមន្រ្តីក្រសួងសាធារណៈការ ៖ យានយន្តអគ្គិសនីនៅកម្ពុជាកើនឡើងដល់ជាង៨០០ភាគរយ

ភ្នំពេញ – លោក ស៊ុន ចាន់ថុល រដ្ឋមន្រ្តីក្រសួងសាធារណការ និង​ដឹកជញ្ជូន បានឱ្យដឹងថា យានយន្តអគ្គិសនីនៅកម្ពុជាមានការកើនឡើងជាង៨០០ភាគរយ ។ កំណើននេះ បានធ្វើ​ឱ្យ​លោក​មាន​ការ​ពេញ​ចិត្ត​យ៉ាង​ខ្លាំង។

បើតាមប្រសាសន៍​លើក​ឡើងរបស់​លោក ស៊ុន ចាន់ថុល ក្នុង​រយៈពេល៥ខែឆ្នាំ២០២២ មានយានយន្តអគ្គិសនី៨៤គ្រឿង ត្រូវបាននាំចូល បើធៀបនឹងរយៈពេលដូចគ្នាក្នុងឆ្នាំ២០២១ មានយានយន្តអគ្គិសនីត្រឹមតែ៩គ្រឿងប៉ុណ្ណោះ។

ចំពោះទីតាំងបញ្ចូលថាមពលយានយន្តអគ្គិសនីវិញ លោករដ្ឋមន្រ្តី​ក៏​បាន​ឱ្យដឹងដែរថា បច្ចុប្បន្ន​នេះ កម្ពុជា​បានរៀបចំ​ទីតាំងសាកបញ្ចូលចំនួនបីកន្លែងហើយ ដោយមាន​នៅក្រសួងសាធារណការ និងដឹកជញ្ជូន មានមួយកន្លែង នៅខេត្តព្រះសីហនុមួយកន្លែង និងនៅស្ថានីយប្រេងកាល់តិច មានមួយកន្លែង។ ក្នុងនោះ​ក្រសួងគ្រោងដាក់ទីតាំងបញ្ចូលថាមពលយានយន្តអគ្គិសនី មួយកន្លែងទៀត នៅខេត្តបាត់ដំបង មួយកន្លែងនៅខេត្តសៀមរាប ស្របពេលដែលក្រុមហ៊ុនប្រេងឥន្ធនៈភីធីធី គ្រោងដាក់ពីរកន្លែង តាមផ្លូវល្បឿនលឿនភ្នំពេញ ក្រុងព្រះសីហនុ។

បើតាម​លោករដ្ឋមន្រ្តី ស៊ុន ចាន់ថុល សព្វថ្ងៃកម្ពុជាមានក្រុមហ៊ុនចំនួន៩ដែលនាំចូលរថយន្ត និងម៉ូតូប្រើអគ្គិសនី។ បន្ថែមពីនេះ កម្ពុជាក៏មានក្រុមហ៊ុនមួយ គឺក្រុមហ៊ុ​ន ONION កំពុងដំឡើងកង់បីអគ្គិសនី​នៅកម្ពុជា ដោយគ្រោងផលិតឱ្យបាន២ពាន់ទៅ៣ពាន់គ្រឿង ក្នុងមួយឆ្នាំ ហើយក៏មានក្រុមហ៊ុនផលិតម៉ូតូអគ្គិសនីផងដែរ ដែលផលិតផលទាំងនេះ អាចនាំចេញទៅក្រៅប្រទេសបាន។

ជាមួយ​គ្នា​បច្ចុប្បន្នក្រសួងសាធារណការ និងដឹកជញ្ជូន ក៏​កំពុងសហការគ្នាជាមួយ UNDP និងផ្នែកឯកជន ដើម្បីជំរុញកំណើនយានយន្តអគ្គិសនី ក៏ដូចជាបង្កើនវត្តមាននៃកន្លែងបញ្ចូលថាមពល ក្នុងប្រទេសកម្ពុជា ខណៈរាជរដ្ឋាភិបាលកម្ពុជា បន្ថយពន្ធនាំចូល៥០% ដើម្បីលើកទឹកចិត្តការប្រើប្រាស់រថយន្តអគ្គិសនីនៅកម្ពុជា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។