សមត្ថកិច្ចចាប់ខ្លួនយុវជន២នាក់ ក្រោយធ្វើគ្រាប់បែកច្នៃបំផ្ទុះនៅក្រុងសៀមរាប
យុវជនចំនួន២នាក់ ត្រូវបានសមត្ថកិច្ចធ្វើការចាប់ខ្លួនកាលពីថ្ងៃទី៧ ខែមិថុនា កន្លងទៅនេះ ក្រោយពួកគេកែច្នៃធ្វើគ្រាប់បែកបំផ្ទុះនៅនៅមុខស្នាក់ការគណបក្ស ប្រជាជនកម្ពុជា ស្ថិតក្នុងសង្កាត់ស្វាយដង្គុំ ខេត្តសៀមរាបកាលពីយប់ថ្ងៃទី៣ ខែ មិថុនា ឆ្នាំ ២០២២ ដែលជាថ្ងៃបិទបញ្ចប់នៃ យុទ្ធនាការរឃោសនាបោះឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី៥។
លោកវរសេនីយ៍ទោ ដា ចម្រើន អធិការនគរបាលក្រុងសៀមរាប បានឱ្យដឹងថា ជនសង្ស័យ២នាក់ ដែលពាក់ព័ន្ធកែច្នៃរំសេវបំផ្ទុះនៅកណ្ដាលក្រុងសៀមរាប ទី១ឈ្មោះ សេង សុកន ភេទប្រុស អាយុ១៨ឆ្នាំ និងទី២ឈ្មោះ រ៉ន ដារ៉ុង ហៅ ហ៊ីង ភេទប្រុស អាយុ២០ឆ្នាំ អ្នកទាំងពីរមានមុខរបរជួសជុលម៉ូតូ បច្ចុប្បន្នស្នាក់នៅបន្ទប់ជួលក្នុងក្រុងសៀមរាប ខេត្តសៀមរាប។
នៅចំពោះមុខសមត្ថកិច្ច ជនសង្ស័យឈ្មោះ សេង សុកន បានឆ្លើយសារភាពថា ខ្លួនពិតជាបានកែច្នៃរំសេវមែន ដោយសារតែឈ្មោះ រ៉ន ដារ៉ុង ហៅ ហ៊ីង ប្រាប់ខ្លួនថា មានគេវាយនៅសួនបឹងកាឡូ ហើយខ្លួនក៏ប្រាប់ថា ខ្លួនចេះផលិតរំសេវផ្ទុះពេលនៅថៃ។ បន្ទាប់មកឈ្មោះ រ៉ន ដារ៉ុង បានឱ្យលុយខ្លួនទៅទិញផាវគ្រាប់បាល់យកមកផលិតជាគ្រឿងផ្ទុះ។ ពេលបានប្រាក់ហើយខ្លួនបានទៅទិញផាវគ្រាប់បាល់ចំនួន៥០គ្រាប់យកមកផលិតជាមួយនឹងថ្មខ្មៅម៉ិច ផលិតបានចំនួន០៥គ្រាប់ រួចឈ្មោះ រ៉ន ដារ៉ុង ដឹកខ្លួនទៅកន្លែងដែលគេវាយ។
ដោយនៅថ្ងៃទី០៣ ខែមិថុនា ឆ្នាំ២០២២ វេលាម៉ោងប្រហែល៨យប់ ខ្លួនបានបោកគ្រាប់បែកនៅទីតាំងដែលឈ្មោះ រ៉ន ដារ៉ុង បានប្រាប់ បន្ទាប់មកខ្លួនក៏បានយកគ្រាប់រំសេវកែច្នៃចំនួន៤គ្រាប់ដែលនៅសល់ យកមកហែកបោះចោលតាមផ្លូវ។
បច្ចុប្បន្នកម្លាំងនគរបាលក្រុងសៀមរាប កំពុងរៀបចំសំណុំរឿងបញ្ជូនជនសង្ស័យទាំង២នាក់ ទៅតុលាការដើម្បីចាត់ការតាមផ្លូវច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។