បង្ក្រាបរថយន្តដឹកឈើចេញពីខេត្តព្រះវិហារ បានបីគ្រឿង រួមទាំងរថយន្តដែលចោរចូលលួចនៅសង្កាត់ព្រៃឈើរវៀង
(ព្រះវិហារ) ៖ រថយន្តដឹកឈើចំនួន៣គ្រឿង ត្រូវបានកម្លាំងសមត្ថកិច្ចចម្រុះ ចាប់បានកាលពីយប់ថ្ងៃទី១៣ ខែសីហា ឆ្នាំ២០២២ ។
លោក នួន សុខុម នាយខ័ណ្ឌរដ្ឋបាលព្រៃឈើព្រះវិហារបានឱ្យដឹងថា រថយន្តដឹកឈើទាំង៣គ្រឿងកម្លាំងចាប់បាននោះ មាន រថយន្តដឹកឈើលេខ២ ចំនួន ១ គ្រឿង ម៉ាកសាំយ៉ុង ពណ៌លឿង ចាប់នៅព្រំប្រទល់ ជីអោក និងរថយន្តដឹកឈើលេខ១ ចំនួន ២ គ្រឿងទៀត ម៉ាកតូយ៉ូតា សុីណា ១ គ្រឿង ពណ៌ស ពាក់ស្លាកលេខ ភ្នំពេញ 2E 0893 និងរថយន្តម៉ាកតូយ៉ូតា ហាយឡេនឌ័រ ពណ៌ស ដឹកឈើប្រភេទលេខ១ សុក្រម ពេញឡាន ជារថយន្តរបស់ក្រុមមេឈ្មួញជើងខ្លាំង ឈ្មោះ តុលា ចាប់បាន នៅភូមិទួលឈ្នួន ឃុំរុះរាន់ ស្រុករវៀង ខេត្តព្រះវិហារ ។
លោក នួន សុខុម បានឱ្យដឹងទៀតថា នៅម៉ោង ៥ ល្ងាច រថយន្តសាំយ៉ុងដឹកឈើលេខ ២ ចេញពីស្រុករវៀង យកទៅកំពង់ធំ លោកបានផ្តល់ដំណឹង ទៅកម្លាំងនគរបាលសេដ្ឋកិច្ច ខេត្ត ប្រចាំការនៅព្រំប្រទល់ ឃាត់រថយន្តដឹកឈើនេះ យកមករក្សាទុកនៅសង្កាត់រដ្ឋបាល ព្រៃឈើរវៀង ។ នៅយប់ថ្ងៃដដែលនោះ លោកបានដឹកនាំកម្លាំងចម្រុះ ចុះទៅដល់ភូមិ ឃុំ ខាងលើ បានប្រទះឃើញក្រុមរថយន្តដឹកឈើ លេខ១ ចំនួន ២ គ្រឿង បម្រុងដឹកចេញ ប៉ុន្តែត្រូវបានកម្លាំងយើង ស្ទាក់ចាប់បាន ។ ចំណែកតៃកុងរថយន្ត បានរត់គេចខ្លួនបាត់ ។
បើតាមលោក នួន សុខុម ករណីបង្ក្រាបរថយន្តដឹកឈើខាងលើ កម្លាំងជំនាញ បន្តស្រាវជ្រាវ រកមុខសញ្ញា ដើម្បីកសាងសំណុំរឿង ចាត់ការ ទៅតាមនីតិវិធីច្បាប់ ។ ចំណែកវត្ថុតាង មានរថយន្តចំនួន បី គ្រឿង រួមទាំងឈើមួយចំនួន ត្រូវបានរឹបអូស យកមករក្សាទុក នៅផ្នែករដ្ឋបាលព្រៃឈើរវៀង ដើម្បីកសាងសំណុំរឿង ចាត់ការទៅតាមផ្លូវច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។