មន្ទីរបរិស្ថានខេត្តក្រចេះ ស្រាវជ្រាវជនមួយក្រុមតូច ប្រើឈ្មោះមន្ត្រីបរិស្ថាន ដើរជម្រិតទារប្រាក់ ពីប្រជាពលរដ្ឋ

មន្ទីរបរិស្ថានខេត្តក្រចេះ កំពុងតែធ្វើការស្រាវជ្រាវ ក្រុមជនខិលខូចមួយចំនួនតូច ដែលបានក្លែងបន្លំ ជាមន្ត្រីបរិស្ថាន ដើរអុកឡុក បំពុលសង្គម ក្នុងការជម្រិតទារប្រាក់ ពីប្រជាពលរដ្ឋ ជាហូរហែ ស្ទើរគ្រប់ទីកន្លែង ដើម្បីយកអនុវត្តតាមច្បាប់។

មន្ទីរបរិស្ថានខេត្តក្រចេះ បានសម្តែងការសោកស្តាយ ចំពោះសកម្មភាពរបស់ ជនមួយក្រុមតូច ដែលតែងតែចេញមុខ មកធ្វើការអះអាង និងក្លែងបន្លំថា ខ្លួនជាមន្ត្រីបរិស្ថាន ដើម្បីធ្វើការទប់ស្កាត់បទល្មើស ធនធានធម្មជាតិ តែការពិតជន ទាំងអស់នេះ បានធ្វើការអុកឡុក បំពុលសង្គម ដោយយកឈោ្មះ បរិស្ថានជាគោល ក្នុងការជម្រិតទារប្រាក់សាធារណជន ជាហូរហែ ស្ទើរគ្រប់ទីកន្លែង។

ថ្មីៗនេះ យោងតាមបណ្ដាញសង្គមសារព័ត៌មានមួយ បានធ្វើការបង្ហោះ ពីករណីមានបុគ្គលម្នាក់ អះអាងថា ខ្លួនជាមន្ត្រីបរិស្ថាន ជាអ្នកជំនាញ ទប់ស្កាត់បទល្មើស ធនធានធម្មជាតិ មកធ្វើការឃាត់ម៉ូតូរ៉ឺម៉កដឹកគ្រែ និងតុបន្តិចបន្តួចរបស់ ប្រជាពលរដ្ឋលក់ដូរ ចិញ្ចឹមក្រពះ ដើម្បីជម្រិតទារប្រាក់គាត់ ដែលប្រព្រឹត្តទៅ នៅក្នុងឃុំអូរគ្រៀង ស្រុកសំបូរ ខេត្តក្រចេះ។ ការក្លែងបន្លំជា មន្ត្រីបរិស្ថាន មកប្រើប្រាស់នេះ វាជាមធ្យោបាយមួយ ដើម្បីដើរជម្រិតទារប្រាក់ ប្រជាពលរដ្ឋ។

មន្ទីរបរិស្ថានខេត្តក្រចេះ បានបញ្ជាក់ថាៈ បុគ្គលដែលសារព័ត៌មានផុសខាងលើ ពុំមែនជាមន្ត្រីរាជការ នៃមន្ទីរបរិស្ថាន ខេត្តក្រចេះឡើយ។ ហេតុនេះ មន្ទីរបរិស្ថានខេត្តក្រចេះ នឹងស្រាវជ្រាវរកកំណត់ អត្តសញ្ញាណជន ដែលប្រព្រឹត្ត​ដើម្បីបន្តនីតិវិធី។

ជាមួយគ្នានេះ មន្ទីរបរិស្ថានខេត្តក្រចេះ សង្ឃឹមយ៉ាងមុតមាំថា ក្រុមជនមួយក្តាបតូច ដែលតាំងខ្លួន ជាអ្នកការពារ និងអភិរក្ស​ធនធានធម្មជាតិទាំងអស់ បញ្ឈប់នូវ សកម្មភាពក្លែងបន្លំយកឈ្មោះមន្ទីរបរិស្ថានមកប្រើប្រាស់បន្តទៀត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។