រថយន្តព្រូស បើកលឿនរេចង្កូតទៅបុកគាប់ជាប់បង្គោលភ្លើង ស្លាប់ម្នាក់ របួស៤នាក់ នៅផ្លូវជាតិលេខ៣
ភ្នំពេញ៖ គ្រោះថ្នាក់ចរាចរណ៍មួយ បង្កដោយរថយន្តព្រូស បើកលឿនរេចង្កូតទៅបុកគាប់ជាប់បង្គោលភ្លើងបណ្ដាលឲ្យស្លាប់ម្នាក់ ពេលបញ្ជូនដល់មន្ទីពេទ្យ និងរងរបួសធ្ងន់ស្រាល៤នាក់ កំពុងជួយសង្គ្រោះ។ ហេតុការណ៍នេះ បានកើតឡើងនៅម៉ោង១៖៣០នាទី រសៀលថ្ងៃទី២៦ ខែធ្នូ ឆ្នាំ២០២២ ស្ថិតនៅតាមបណ្ដោយផ្លូវជាតិលេខ៣ ភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ។
សមត្ថកិច្ចមូលដ្ឋាន បានឲ្យដឹងថា អ្នកបើកបរឈ្មោះ ថេង វណ្ណវា អាយុ៣៤ឆ្នាំ មុខរបរមន្ត្រីរាជការ ស្នាក់នៅភូមិទ្រុងមាន់ សង្កាត់អូបែកក្អម ខណ្ឌសែនសុខ។ មុនកើតហេតុ រថយន្តម៉ាក prius ពណ៌ទឹកមាស ពាក់ស្លាកលេខភ្នំពេញ 2BD-6574 បើកបរដោយបុរសម្នាក់ មានអ្នករួមដំណើរ៤នាក់ផ្សេងទៀត បើកតាមបណ្ដោយផ្លូវជាតិលេខ៣ ក្នុងទិសដៅពីត្បូងមកជើង ខណៈដល់ចំណុចកើតហេតុរថយន្តរេចង្កូតមកស្ដាំដៃ ក៏ជ្រុលទៅបុកបង្គោលភ្លើងគាបជាប់បណ្ដាលឲ្យបុរសម្នាក់ស្លាប់ ពេលបញ្ជូនដល់មន្ទីរពេទ្យ និង៤នាក់ទៀតរបួសធ្ងន់ស្រាល។
ក្រោយកើតហេតុ កម្លាំងសមត្ថកិច្ចមូលដ្ឋាន បានសហការជាមួយជំនាញការិយាល័យចរាចរណ៍ ចុះវាស់វែង និងស្ទូចយករថយន្តទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំធ្វើការដោះស្រាយនៅពេលក្រោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។