សហព័ន្ធកីឡាគុនល្បុកតោកម្ពុជា៖ ការប្រកួតកីឡាគុនល្បុកតោ ជាការប្រកួតធំប្រចាំឆ្នាំ និងទទួលបានជោគជ័យ
ភ្នំពេញ៖ កាលពីថ្ងៃទី៣០ ខែធ្នូ ឆ្នាំ២០២២ ឯកឧត្តម កែវ រ៉េមី រដ្ឋមន្ត្រីប្រតិភូអមនាយករដ្ឋមន្ត្រី និងជាអនុប្រធានទី១ សហព័ន្ធកីឡាគុនល្បុកតោកម្ពុជា បានអញ្ជើញជាអធិបតីភាព ក្នុងពិធីបិទការប្រកួតកីឡាគុនល្បុកតោជ្រើសរើសជើងឯកថ្នាក់ជាតិឆ្នាំ២០២២ ក្នុងពិធីនេះដែរ ក៏មានការអញ្ជើញចូលរួមពីសំណាក់ លោកប៉ែន វុទ្ធី អនុប្រធានទទួលបន្ទុករួមនាយកដ្ឋានអប់រំកាយ និងកីឡា តំណាងក្រសួងអប់រំ យុវជន និងកីឡា និង លោកព្រឹទ្ធាចារ្យ សាន គឹមស៊ាន ព្រមទាំងឯកឧត្តម លោកជំទាវ អស់លោក លោកស្រី ដែលជាតំណាងក្លឹប និងមន្ត្រីពាក់ព័ន្ធនានា។
លោក អ៊ូ តារា អគ្គលេខាធិការរង សហព័ន្ធកីឡាគុនល្បុក្កតោកម្ពុជា បានប្រាប់ឲ្យដឹងថាៈ សហព័ន្ធកីឡាគុនល្បុក្កតោកម្ពុជា មានកិត្តិយសយ៉ាងធំធេង បានរៀបចំការប្រកួតកីឡាគុនល្បុក្កតោជ្រើសរើសជើងឯកថ្នាក់ជាតិឆ្នាំ២០២២ ដែលជាការប្រកួតធំប្រចាំឆ្នាំ និងទទួលបានជោគជ័យ ហើយកីឡាករ កីឡាការិនី ដែលមកពីសាលាគុនចំនួន២៥ តាមបណ្តាខេត្ត រាជធានី-ខេត្ត ក្នុងនោះដែរប្រតិភូគ្រូបង្វឹកមានចំនួន៤៣ រូប កីឡាករ ១០២រូប កីឡាការិនី ៦៨ រូប។
លទ្ធផលការប្រកួត៖ ក្រសួងមហាផ្ទៃ ដណ្តើមមេដាយមាស៥គ្រឿង ប្រាក់ ២ គ្រឿង និងសំរិទ្ធ ៤គ្រឿង ក្រុមកីឡាគុនល្បុក្កតោ សុវណ្ណអង្គរនាគរាជខេត្តសៀមរាប ឈ្នះមេដាយមាស ៤ គ្រឿង និងប្រាក់ ២ គ្រឿង ក្រុមកីឡាគុនល្បុក្កតោខេត្តតាកែវ (គោកធ្លក) ឈ្នះមេដាយមាស ៣ គ្រឿង ប្រាក់ ៣ គ្រឿង និងសំរិទ្ធ ២ គ្រឿង និងក្រុមកីឡាគុនល្បុក្កតោខេត្តតាកែវ ឈ្នះមេដាយមាស ២ គ្រឿង ប្រាក់ ២ គ្រឿង និងសំរិទ្ធ ១ គ្រឿង ក្រុមកីឡាគុនល្បុក្កតោ អង្គរមានឫទ្ធិ ឈ្នះមេដាយមាស ២ គ្រឿង ប្រាក់ ១ គ្រឿង និងសំរិទ្ធ ២ គ្រឿង ក្រុមកីឡាគុនល្បុក្កតោខេត្តកំពង់ឆ្នាំង ឈ្នះមេដាយមាស ២ គ្រឿង និងសំរិទ្ធ ៣ គ្រឿង ក្រុមកីឡាគុនល្បុក្កតោខេត្តរតនគិរី ឈ្នះមេដាយមាស ១ គ្រឿង ប្រាក់ ៣ គ្រឿង និងសំរិទ្ធ ២ គ្រឿង ក្រុមកីឡាគុនល្បុក្កតោ កងពលតូច ថ្មើរជើងលេខ៥១ ឈ្នះមេដាយមាស ១គ្រឿង និងប្រាក់ ១គ្រឿង និងក្រុមកីឡា គុនល្បុក្កតោដំរីស ឈ្នះមេដាយមាស ១ គ្រឿង និងសំរិទ្ធ ១ គ្រឿង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។