ទឹកជំនន់សម្លាប់មនុស្សជាង ៤០នាក់ និងកំពុងបាត់ខ្លួន ១៧នាក់

ចំនួនអ្នកស្លាប់នៅក្នុងគ្រោះទឹកជំនន់ រអិលបាក់ដី និងកម្អែភ្នំភ្លើងត្រជាក់ហូរចេញពីភ្នំភ្លើងមួយ ស្ថិតនៅភាគខាងលិចប្រទេសឥណ្ឌូណេស៊ី កាលពីចុងសប្ដាហ៍កន្លងទៅនេះ បានកើនដល់៤១នាក់ និង១៧នាក់ទៀតបានបាត់ខ្លួន។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

មន្ត្រីម្នាក់មកពីទីភ្នាក់ងារគ្រប់គ្រងគ្រោះមហន្តរាយប្រចាំខេត្ត West Sumatra បានប្រាប់ AFP​ ថាតួលេខអ្នកស្លាប់កាលពីយប់ថ្ងៃអាទិត្យ មាន ៣៧នាក់ តែនៅព្រឹកថ្ងៃចន្ទ ទី១៣ ខែឧសភានេះបានកើនដល់៤១នាក់ ខណៈក្រុមអ្នកជួយសង្រ្គោះកំពុងតាមស្វែងរកអ្នកបាត់ខ្លួន១៧នាក់។

ភ្លៀងធ្លាក់ខ្លាំងបង្កជាគ្រោះទឹកជំនន់ និងរអិលបាក់ដី រួមជាមួយកម្អែភ្នំភ្លើងត្រជាក់ហូរចេញពីភ្នំភ្លើង Marapi បានវាយប្រហារលើស្រុកចំនួន ២ នៅលើកោះ Sumatra កាលពីល្ងាចថ្ងៃសៅរ៍ចុងសប្ដាហ៍កន្លងទៅ ដោយបង្ខំឱ្យមនុស្សជាច្រើនត្រូវជម្លៀសខ្លួនចេញពីផ្ទះសម្បែង។ ប៉ុន្តែ តួលេខអ្នកត្រូវបានជម្លៀសខ្លួន មិនទាន់ត្រូវបានបញ្ជាក់នៅឡើយទេ។

គួរបញ្ជាក់ថា កាលពីខែធ្នូ ឆ្នាំ២០២៣ មនុស្សយ៉ាងហោច ២០នាក់ ត្រូវបានសម្លាប់ បន្ទាប់ពីភ្នំភ្លើង Marapi បានផ្ទុះ ហើយការផ្ទុះភ្នំភ្លើងនេះជាបន្តបន្ទាប់ ក៏បានកើតឡើងផងដែរ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។