អាជ្ញាធរហ្វីលីពីន ឲ្យប្រជាជនជម្លៀសខ្លួន និងប្រុងប្រយ័ត្នខ្ពស់ ក្រោយភ្នំភ្លើងផ្ទុះ

អាជ្ញាធរនៅក្នុងប្រទេសហ្វីលីពីន បានបង្គាប់ឱ្យប្រជាជនរស់នៅក្បែរភ្នំភ្លើងមួយ ស្ថិតនៅភាគកណ្ដាលនៃប្រទេសជម្លៀសខ្លួនទៅកន្លែងមានសុវត្ថិភាព នៅព្រឹកថ្ងៃអង្គារ ទី៤ ខែមិថុនានេះ បន្ទាប់ពីការផ្ទុះភ្នំភ្លើងជះផេះ៥គីឡូម៉ែត្រទៅលើមេឃ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ជាមួយការចេញបង្គាប់ឱ្យជម្លៀសខ្លួន ក្រុមមន្ត្រីហ្វីលីពីនក៏បានព្រមានដែរពីលទ្ធភាពនៃការផ្ទុះសាជាថ្មីនៃភ្នំភ្លើង Kanlaon ដែលអាចបញ្ចេញផេះ និងជះក្លិន អាស៊ីដស៊ុលហ្វរីក ប៉ះពាលដល់សុខភាព ព្រមទាំងគ្រោះទឹកជំនន់ភ្លាមៗ ល្បាប់ភក់ និងគ្រោះថ្នាក់ផ្សេងទៀត។ នៅក្នុងសេចក្ដីជូនដំណឹងមួយ ក្រុមមន្ត្រីហ្វីលីពីន បានបញ្ជាក់ដូច្នេះថា «យើងសូមណែនាំឱ្យអ្នកទាំងគ្នាស្នាក់នៅជំរំស្នាក់នៅបណ្ដោះអាសន្ន ហើយសម្រាប់អ្នកដែលមិនទាន់ជម្លៀសខ្លួន យើងសង្ឃឹមថាពួកគេនឹង ពិចារណាឡើងវិញ»។

គួរបញ្ជាក់ថា ការផ្ទុះភ្នំភ្លើងរយៈពេល ៦នាទី បានបង្ខំឱ្យអាជ្ញាធរហ្វីលីពីនបិទសាលារៀនជាបណ្ដោះអាសន្ន ក្នុងទីក្រុង Canlaon នៃខេត្ត Negros Orientalខណៈ ក្រុមហ៊ុនអាកាសចរណ៍ចំនួន៣ បានលុបចោលជើងហោះហើរចំនួន៣២ នៅថ្ងៃអង្គារនេះ។ រដ្ឋាភិបាលហ្វីលីពីន មិនទាន់រាយការណ៍ថាតើមានអ្នកបាត់ខ្លួន រងរបួស ឬក៏អ្នកបាត់បង់ជីវិត ដែរឬក៏យ៉ាងណានោះទេ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។