សមត្ថកិច្ចតាមចាប់ខ្លួនលោកជំទាវ លី អ៊ុំអេង សារជាថ្មី ពាក់ព័ន្ធបទល្មើសក្លែងឯកសារសាធារណៈ
លោកជំទាវ លី អ៊ុំអេង ដែលមានរឿងអាស្រូវពាក់ព័ន្ធករណីជម្លោះដីធ្លីនៅខេត្តសៀមរាប ពេលនេះ សមត្ថកិច្ចកំពុងតាមស្វែងរកចាប់ខ្លួនម្តងទៀត តាមដីកាតុលាការ ពាក់ព័ន្ធករណីក្លែងឯកសារសាធារណៈ។
ដីកាបង្គាប់ឱ្យចាប់ខ្លួនរបស់សាលាដំបូងខេត្តសៀមរាប បានបញ្ជាក់ថា ឈ្មោះ លី អ៊ុំអេង ភេទស្រី កើតថ្ងៃទី១៨ ខែធ្នូ ឆ្នាំ១៩៧២ ត្រូវដាក់ក្រោមការពិនិត្យពីបទ ប្រើប្រាស់ឯកសារសាធារណៈក្លែង ប្រព្រឹត្តនៅក្រុងសៀមរាប ខេត្តសៀមរាប កាលពីអំឡុងខែកុម្ភៈ រហូតដល់ខែតុលា ឆ្នាំ២០២២ ។ បទល្មើសក្លែងឯកសារសាធារណៈ ជាបទល្មើសព្រហ្មទណ្ឌមានចែង និងកំណត់ឱ្យផ្តន្ទាទោសតាមបញ្ញត្តិមាត្រា៦៣០ នៃក្រមព្រហ្មទណ្ឌ ដូច្នេះជនត្រូវចោទ ត្រូវបានចោទប្រកាន់ពីបទមជ្ឈឹមដែលត្រូវផ្តន្ទាទោសដាក់ពន្ធនាគារ។
បើតាមដីកាដដែលថា កម្លាំងកងរាជអាវុធហត្ថខេត្តសៀមរាប បានចុះទៅដល់លំនៅដ្ឋានរបស់លោកជំទាវ លី អ៊ុំអេង ដើម្បីអនុវត្តដីកាបង្គាប់ឱ្យខ្លួន កាលពីចុងខែកក្កដា តែរកពុំឃើញជនត្រូវចោទ ដូច្នេះ តុលាការបញ្ជាដល់កងកម្លាំងសាធារណៈ ឱ្យធ្វើការស្រាវជ្រាវរកចាប់ និងនាំខ្លួនឈ្មោះ លី អ៊ុំអេង ទៅក្នុងពន្ធនាគារ ឬមណ្ឌលឃុំខ្លួន។
យ៉ាងណាក៏ដោយ ក្រោយមានដីកាឱ្យតាមចាប់ខ្លួននេះ កាលពីថ្ងៃទី១៩ ខែសីហា គេបានឃើញ កម្លាំងអាវុធហត្ថផ្ទៃប្រទេស សហការជាមួយកម្លាំងអាវុធហត្ថខេត្តសៀមរាប បានចុះមកឡោមពទ្ធ័ផ្ទះជំទាវលី អ៊ុំអេង ដើម្បីចាប់ខ្លួន ប៉ុន្តែរកមិនឃើញ ក្រុមសមត្ថកិច្ចក៏នាំគ្នាឡើងឡានចាកចេញទៅវិញ។
សូមរំលឹកផងដែរថា ជំទាវឈ្មួញដី លី អ៊ុំអេង កាលពីថ្ងៃទី៨ ខែវិច្ឆិកា ឆ្នាំ២០១៨ ក៏ត្រូវបានសមត្ថកិច្ចអាវុធហត្ថខេត្តសៀមរាប ធ្លាប់បានចាប់វាយខ្នោះបញ្ជូនទៅតុលាការម្តងរួចមកហើយករណីចេញសែកអត់សាច់ប្រាក់ក្នុងជំនួញដីធ្លី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។