NASA និង SpaceX ពន្យារពេលបេសសកម្មទៅយកអវកាសយានិកជាប់គាំងនៅស្ថានីយ ISS

បេសកកម្មរបស់អង្គការ NASA និង SpaceX ដែលមានគោលបំណងត្រួសត្រាយផ្លូវទៅនាំយកអវកាសយានិកចំនួនពីររូប ដែលជាប់គាំងនៅស្ថានីយអវកាសអន្តរជាតិ (ISS) ជាច្រើនខែ ត្រឡប់មកកាន់ផែនដីវិញ ត្រូវបានពន្យារពេលសិន។

គ្រាប់រ៉ុក្តែត Falcon 9 របស់ SpaceX នឹងត្រូវបញ្ជូនទៅកាន់ទីអវកាស ចេញពីមូលដ្ឋានបាញ់បង្ហោះ Cape Canaveral ក្នុងរដ្ឋផ្លរីដា តែត្រូវបានផ្អាកជាបណ្តោះអាសន្នសិន ដោយសារតែបញ្ហាបច្ចេកទេសត្រង់ប្រព័ន្ធអ៊ីដ្រូលីក ដែលក្រុមវិស្វករកំពុងព្យាយាមជួសជុល។ ប៉ុន្តែនៅតែមានឱកាសបាញ់បង្ហោះដែលអាចទៅរួចនៅថ្ងៃព្រហស្បតិ៍។

បើតាមផែនការគ្រោងទុក រ៉ុក្កែតនេះមានគោលបំណងបញ្ជូនអវកាសថ្មីចំនួន ៤រូបឡើងទៅកាន់ស្ថានីយ៍អវកាសអន្តរជាតិ (ISS) និងត្រួសត្រាយផ្លូវសម្រាប់ការវិលត្រឡប់របស់អវកាសយានិកនាង Suni Williams និងលោក Butch Wilmore ដែលជាប់គាំងនៅទីនោះអស់ជាច្រើនខែ។

អវកាសយានិកណាសាទាំងពីររូបនេះ បានឡើងទៅដល់ស្ថានីយ ISS តាំងតែពីខែមិថុនា ឆ្នាំ២០២៤មកម្ល៉េះ តាមរយៈយានអវកាស Starliner របស់ក្រុមហ៊ុន Boeing ហើយដំបូងឡើយ ពួកគេត្រូវស្នាក់នៅលើនោះ ត្រឹមតែ៨ថ្ងៃប៉ុណ្ណោះ។ ប៉ុន្តែបញ្ហាបានកើតឡើងពាក់ព័ន្ធប្រព័ន្ធហោះហើររបស់យាន Starliner ជាហេតុបង្ខំឱ្យ NASA ត្រូវធ្វើការផ្លាស់ប្តូរធំមួយ។

ក្រោយការធ្វើតេស្តជាច្រើនសប្តាហ៍លើយាន Starliner ទីភ្នាក់ងារអវកាស NASA បានសម្រេចចិត្តនាំយកវាត្រឡប់មកផែនដីវិញ ដោយមិនមានផ្ទុកលោក Wilmore និងនាង Williams ឡើយ ពោលគឺអវកាសយានិកទាំងពីររូបត្រូវរង់ចាំត្រឡប់មកវិញ ជាមួយសមាជិកនៃបេសកកម្ម Crew-9 របស់ក្រុមហ៊ុន SpaceX៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។