សហគ្រាសពាណិជ្ជកម្មកម្ពុជា និង ធនាគារ BRIDGE ចុះ MoU ជំរុញហិរញ្ញប្បទានគាំទ្រការនាំចេញផលិតផលកសិកម្ម និងឧស្សាហកម្មកែច្នៃកសិផលកម្ពុជា
(ភ្នំពេញ) ៖ សហគ្រាសពាណិជ្ជកម្មកម្ពុជា (ស.ព.ក) និង ធនាគារ BRIDGE បានចុះហត្ថលេខាលើ អនុស្សរណៈយោគយល់ ក្នុងគោលបំណងបង្កើនកិច្ចសហប្រតិបត្តិការលើការគាំទ្រហិរញ្ញប្បទាន សម្រាប់ វិស័យនាំចេញផលិតផលកសិកម្មកម្ពុជា និងឧស្សាហកម្មកែច្នៃកសិផល ដើម្បីរួមចំណែកលើកកម្ពស់សមត្ថភាពប្រកួតប្រជែងរបស់អ្នកនាំចេញកម្ពុជា និងជំរុញកំណើនសេដ្ឋកិច្ចជាតិប្រកបដោយចីរភាព។
តាមរយៈអនុស្សរណៈយោគយល់នេះ ភាគីទាំងពីរនឹងសហការគាំទ្រដល់ការពង្រឹងការនាំចេញផលិតផលកសិកម្ម និងផលិតផលកែច្នៃកសិផលសំខាន់ៗរបស់កម្ពុជា រួមមាន អង្ករ, គ្រាប់ស្វាយចន្ទី, ពោត, ដំឡូងមី, និង ស្វាយ ព្រមទាំងរោងម៉ាស៊ីនកិនស្រូវ និងរោងចក្រកែច្នៃពាក់ព័ន្ធ។ កិច្ចសហការនេះមានគោលដៅជួយអភិវឌ្ឍសមត្ថភាពរបស់អ្នកនាំចេញក្នុងការចូលទៅកាន់ទីផ្សារអន្តរជាតិ និងទទួលបានឱកាសពាណិជ្ជកម្មកាន់តែទូលំទូលាយ។
ក្រោមភាពជាដៃគូនេះ ធនាគារ BRIDGE នឹងសហការជាមួយ សហគ្រាសពាណិជ្ជកម្មកម្ពុជា ក្នុងការអភិវឌ្ឍ និងផ្តល់ជូន ឥណទានដែលតម្រូវតាមតម្រូវការរបស់អ្នកនាំចេញ លើសពីនេះ ភាគីទាំងពីរនឹងសម្របសម្រួលការទទួលបានឥណទានសម្រាប់អ្នកនាំចេញដែលមានសិទ្ធិ ស្របតាមលក្ខខណ្ឌ និងនីតិវិធីដែលបានព្រមព្រៀង។ កិច្ចខិតខំប្រឹងប្រែងនេះមានគោលបំណងជួយបន្ថយឧបសគ្គផ្នែកហិរញ្ញវត្ថុ និងបង្កើនលទ្ធភាពឲ្យអាជីវកម្មនាំចេញអាចពង្រីកប្រតិបត្តិការ និងឆ្លើយតបទៅនឹងតម្រូវការទីផ្សារបានកាន់តែមានប្រសិទ្ធភាព។
លោកស្រី គឹម ស្រីរ័ត្ន នាយកប្រតិបត្តិ ស.ព.ក បានមានប្រសាសន៍ថា៖ “អនុស្សរណៈយោគយល់នេះបង្ហាញពីការប្តេជ្ញាចិត្តរួមរវាង ស.ព.ក និង ធនាគារ BRIDGE ក្នុងការគាំទ្រអ្នកនាំចេញកម្ពុជា ជាពិសេសក្នុងវិស័យកសិកម្ម និងឧស្សាហកម្មកែច្នៃកសិផល។ យើងជឿជាក់ថា ការសម្របសម្រួលផ្នែកហិរញ្ញប្បទាន និងការចែករំលែកចំណេះដឹងនឹងជួយបង្កើនសមត្ថភាពប្រកួតប្រជែង និងបើកទូលាយ ឱកាសថ្មីៗសម្រាប់ផលិតផលកម្ពុជានៅលើទីផ្សារអន្តរជាតិ”។
លោក Richard Liew នាយកប្រតិបត្តិ នៃធនាគារ BRIDGE បានមានប្រសាសន៍ថា “ធនាគារ BRIDGE មានមោទកភាពដែលបានចូលរួមជាដៃគូជាមួយ ស.ព.ក ក្នុងការគាំទ្រដល់វិស័យនាំចេញរបស់កម្ពុជា។ តាមរយៈដំណោះស្រាយហិរញ្ញប្បទានដែលបត់បែន និងសមស្របតាមតម្រូវការ យើងមានបំណងជួយដល់អាជីវកម្មនាំចេញឲ្យមានលទ្ធភាពទទួលបានធនធានហិរញ្ញវត្ថុដែលចាំបាច់ សម្រាប់ការរីកចម្រើន និងការពង្រីកទីផ្សារ”។
អនុស្សរណៈយោគយល់នេះឆ្លុះបញ្ចាំងពីចក្ខុវិស័យរួមរបស់ភាគីទាំងពីរ ក្នុងការជំរុញប្រព័ន្ធអេកូឡូស៊ីនៃការនាំចេញឲ្យកាន់តែរឹងមាំ តាមរយៈការគាំទ្រហិរញ្ញប្បទាន ការអភិវឌ្ឍសមត្ថភាព និងការសហការដែលមានន័យជាក់ស្តែងសម្រាប់អ្នកនាំចេញកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។