ឡានក្រឡូកស៊ីម៉ង់ត៌បុករះនៅមុខវិទ្យាល័យបឹងត្របែក របួសធ្ងន់ស្រាល៥នាក់
មនុស្សប្រុសស្រីចំនួន៥នាក់បានរងរបួសធ្ងន់ និងស្រាល ខណះពេលកំពុងតែជិះម៉ូតូ ហើយក៏ត្រូវរថយន្តក្រុឡុកស៊ីម៉ង់ត៍មួយគ្រឿងរបស់ក្រុមហ៊ុន SCG បុករះកាលពីវេលាម៉ោងប្រមាណ៨ព្រឹក ថ្ងៃទី២០ ខែកុម្ភៈ នេះ នៅខាងមុខវិទ្យាល័យបឹងត្របែក ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
តាមសេចក្តីរាយការណ៍ពីកន្លែងកើតហេតុឲ្យដឹងថា ដំបូងឡើយគេឃើញមានអ្នកជិះម៉ូតូជាច្រើនគ្រឿងស្របទិសគ្នា ពីត្បូងទៅជើង ខណះពេលនោះ ក៏មានរថយន្តក្រឡុកស៊ីម៉ង់ត៍មួយគ្រឿងពណ៍សលាយលឿង ពាក់ស្លាកលេខ ភ្នំពេញ 5A-0143 បើកមកពីខាងក្រោយក្រុមអ្នកជិះម៉ូតូទាំង ហើយដោយសង្ស័យប្រញាប់យកស៊ីម៉ង់ត៍ទៅចាក់បេតុង ក៏ជ្រុលចង្កូតបុករះកិនអ្នកជិះម៉ូតូនៅខាងមុខ បណ្តាលឲ្យមានអ្នករងរបួសធ្ងន់ និងស្រាល៥នាក់និងខូចខាតម៉ូតូ៦គ្រឿង និង រ៉ឺម៉កឥណ្ឌាចំនួនមួយគ្រឿង ចំណែកអ្នកបើកបររថយន្តបង្កត្រូវបានឃាត់ខ្លួនបញ្ជូនទៅកានអធិការដ្ឋានខណ្ឌចំការមនភ្លាមៗផងដែរ។
ក្រោយពេលកើតហេតុ ជនរងគ្រោះទាំង៥នាក់ ត្រូវបានរថយន្តសាម៊ុយបញ្ជូនទៅធ្វើការសង្គ្រោះបន្ទាន់នៅមន្ទីរពេទ្យមិត្តភាពខ្មែរ-សូវៀត។
ចំណែកម៉ូតូដែលរងការខូចខាតរួមនិងរថយន្ត និងអ្នកបើកបរក្រោយពីធ្វើការវាស់វែងរួចត្រូវបានបញ្ជូនទៅរក្សាទុក និងឃុំខ្លួនបណ្តោះអាសន្ននៅការិយាល័យចរាចរណ៍ជើងគោកស្នងការដ្ឋាននគរបាលរាជធានីភ្នំពេញដើម្បីដោះស្រាយគ្នាតាមផ្លូវច្បាប់នៅពេលក្រោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។