កីឡាករកាមេរ៉ូនម្នាក់មកលេងក្លឹបមិនអាជីពនៅកម្ពុជា រំពឹងក្លាយជាគ្រូបង្ហាត់
John កីឡាករបាល់ទាត់មកពីប្រទេសកាមេរ៉ូនត្រូវកំពុងលេងនៅ Khmer United ដែលជាក្រុមមិនអាជីពមួយលេងនៅពានរង្វាន់ Khmer Real Estate League។ ចំពោះការលេងនៅក្នុងក្រុមនេះ John មិនទទួលបានប្រាក់ខែឡើយ ប៉ុន្តែហេតុអ្វីបានជារូបគេសម្រេចចិត្តលេងរយៈពេល២ឆ្នាំមកនេះ?
John Botioba បានរៀបរាប់ថា រូបគេបានមកប្រទេសកម្ពុជារយៈពេល២ឆ្នាំហើយគឺដើម្បីលេងបាល់ទាត់។ រូបគេធ្លាប់បានចូលលេងនៅក្រុមបៀលប្រាយ និងអាស៊ីអឺរ៉ុបដែលស្ថិតនៅលីគបាល់ទាត់កំពូលកម្ពុជា។ ក្រោយមករូបគេបានចូលលេងឲ្យក្រុម Khmer United ដែលជាក្រុមមិនអាជីពរបស់លោក គីម ហ៊ាង អគ្គនាយកក្រុមហ៊ុន Khmer Real Estate និងជាប្រធានសមាគមអ្នកវាយតម្លៃអចលនទ្រព្យកម្ពុជា។
Jonh បាននិយាយថា ៖«មែនទែនទៅ ខ្ញុំមកលេងបាល់នៅកម្ពុជាដោយមិនគិតពីរឿងលុយទេ។ អ្វីដែលជាកត្តាសំខាន់របស់ខ្ញុំគឺសិក្សាស្វែងយល់ពីរបៀបបង្ហាត់បាល់ទាត់ និងចែករំលែកបទពិសោធន៍ដល់យុវជនកម្ពុជា ពីព្រោះខ្ញុំមានសញ្ញាបត្រ C-License។ គោលបំណងរបស់ខ្ញុំគឺចង់ក្លាយជាគ្រូបង្វឹកបាល់ទាត់ម្នាក់»។ សព្វថ្ងៃនេះបុរសជនជាតិកាមេរ៉ូនរូបនេះកំពុងជួយបង្ហាត់ថ្នាលយុវជនផ្សេងៗទៀត ក្រៅពីលេងឲ្យក្រុម Khmer United។
ពាក់ព័ន្ធនឹងក្រុម Khmer United វិញ John បានឲ្យដឹងថា ថ្ងៃមួយលោក គីម ហ៊ាងបានឃើញការលេងរបស់គេហើយក៏បានទាក់ទងឲ្យចូលរួមក្នុងក្រុមរបស់លោកតែម្តង។ Jonh យល់ឃើញថា លោក គីម ហ៊ាង ពិតជាមនុស្សល្អ និងស្រលាញ់បាល់ទាត់ដោយការបង្កើតក្រុមបាល់ទាត់ទាំងគ្មានស្វែងរកប្រាក់ចំណេញ។ ដូច្នេះហើយទើបបានជារូបគេសម្រេចលេងជាមួយក្រុម Khmer United ទាំងមិនគិតពីលុយកាក់ឡើយ។ លើសពីនេះទៀត បើមានក្លឹបណាចង់បានរូបគេទៅលេងទាល់តែមានការអនុញ្ញាតពីលោក គីម ហ៊ាងទើបរូបគេអាចទៅលេងបាន។
រូបគេពិតជាស្គាល់បាល់ទាត់កម្ពុជាយ៉ាងច្បាស់ និងចង់ឃើញយុវជនកម្ពុជាលេចធ្លោខាងបាល់ទាត់ច្រើននាពេលខាងមុខដូចជាកីឡាករ ចាន់ វឌ្ឍនាកា ដែលបានទៅលេងនៅប្រទេសជប៉ុន។ ជាងនេះទៀតនោះ រូបគេចង់ឃើញក្រុមបាល់ទាត់កម្ពុជាលេចធ្លោក្នុងតំបន់អាស៊ី ហើយក្រុមជម្រើសជាតិកម្ពុជាក៏ខ្លាំងលំដាប់ទ្វីបអាស៊ី និងកម្រិតពិភពលោកផងដែរ។
ឆ្លងកាត់៦ប្រកួតក្នុងពានរង្វាន់ Khmer Real Estate League 2017 ក្រុម Khmer United មិនទាន់ស្គាល់បរាជ័យម្តងណាឡើយក្នុងនោះឈ្នះ៥ និងស្មើ១ដោយឈរលើកំពូលតារាងតែម្តង៕
លទ្ធផលការប្រកួត Khmer Real Estate League សប្តាហ៍ទី៦
Anvaya ២-៣ បាសាក់
និស្ស័យ ២-០ Goodhill
Blue Dragon ២-១ V.Train
ខ្លាស ៣-៣ អាវតា
ណារីតា ៥-០ Havas
Khmer United ៥-០ Giant FC
កូនខ្មែរ ៣-៤ HHK
បាយ័ន ៧-០ យុវជនកំពង់ចាម
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។