រថយន្តហុីយ៉ាន់ដាយដឹកឈើ បុករបាំងថ្មផ្លូវព្រះមុន្នីវង្សពេញទំហឹង ខូចខាតយ៉ាងដំណំ
របាំងថ្មពុះចែកទ្រូងចំនួន២កង់នៅផ្លូវព្រះមុន្នីវង្ស កែងនិងផ្លូវលេខ៣៦០ ស្ថិតក្នុងសង្កាត់បឹងកេងកង៣ ខណ្ឌចំការមន រាជធានីភ្នំពេញ ត្រូវបានរថយន្តហុីយ៉ាន់ដា២តោនកន្លះ ពន្លះយ៉ាងពេញទំហឹង បណ្ដាលឲ្យរងការខូចខាតយ៉ាងដំណំ កាលពីវេលាម៉ោង៣ និង១០នាទីរំលងអាធ្រាត ឈានចូលថ្ងៃទី១១ ខែមិថុនា ឆ្នាំ២០១៩។
បើតាមសម្ដីព្រូរថយន្តបង្កម៉ាក ហុីយ៉ាន់ដាយ ២តោនកន្លះ ពាក់ស្លាកលេខ កំពង់ចាម 3A-3687 រូបគេនិងតៃកុងបានបើករថយន្តដឹកឈើពីស្រុកវិហារសួរ មកខណ្ឌច្បារអំពៅ ដោយធ្វើដំណើរឆ្លងកាត់ផ្លូវព្រះមុន្នីវង្ស ទិសដៅពីជើងមកត្បូង ក្នុងល្បឿនលឿនល្មម ខណះមកដល់ចំណុចកើតហេតុក៏បានគេចនិងរថយន្តផ្សេងនៅខាងមុខ ជ្រុលទៅបុករថយន្តថ្មពុះចែកទ្រូងផ្លូវបាក់អស់ចំនួន២កង់តែម្ដង ឯរថយន្តរងការខូចខាតយ៉ាងដំណំផងដែរ តែមិនបណ្ដាលឲ្យនរណាម្នាក់រងរបួសនោះឡើយ។
ក្រោយកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ ហើយឃាត់តៃកុងរថយន្តបង្ក យកទៅកាន់ប៉ុស្ដិ៍នគរបាលបឹងកេងកង៣ ដើម្បីធ្វើការសាកសួរ ។ ចំណែករថយន្តបង្កវិញ ត្រូវបានសមត្ថកិច្ចជំនាញចរាចរណ៍ចុះមកធ្វើការវាស់វែងយកទៅរក្សាទុកនៅការរិយាល័យចរាចរណ៍ជើងគោក នៃស្នងការនគរបាលរាជធានីភ្នំពេញ រង់ចាំដោះស្រាយតាមផ្លូវច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។