ប្រទះឃើញមនុស្សដេកឆេះស្លាប់ក្នុងភ្នក់ភ្លើង ក្បែរម៉ូតូមួយគ្រឿង ក្នុងចម្ការកៅស៊ូក្រុមហ៊ុនស្នួល
ក្រចេះ៖ កាលពីវេលាម៉ោងប្រមាណ១២ថ្ងៃត្រង់ ថ្ងៃទី២៦ ខែមិថុនា ឆ្នាំ២០១៩ គេបានប្រទះឃើញសាកសពមនុស្សម្នាក់ត្រូវឆេះស្លាប់ក្នុងភ្នក់ភ្លើង ក្បែរម៉ូតូមួយគ្រឿង ក្នុងដីឡូតិ៍កៅស៊ូចម្ងាយពីផ្លូវលំប្រមាណជា ១០០ម៉ែត្រ ត្រង់ចំណុចផ្លូវកាំភ្លើងធំ ក្នុងឡូតិ៍ចម្ការកៅស៊ូក្រុមហ៊ុនស្នួល ភូមិដូនប៉ុក ឃុំសែ្រចារ ស្រុកស្នួល ខេត្តក្រចេះ។
ជនរងគ្រោះត្រូវគេបញ្ជាក់ថា មានឈ្មោះ ខុម សិទ្ធ ភេទប្រុស អាយុ ២៣ឆ្នាំ ជនជាតិខ្មែរ រស់នៅភូមិដូនប៉ុក ឃុំស្រែចារ ស្រុកស្នួល ខេត្តក្រចេះ ។
តាមសម្តីជីដូនរបស់សាកសព ថា មុនពេលកើតហេតុវេលាម៉ោងប្រហែល ១០និង០០នាទីព្រឹក ជនរងគ្រោះបានសុំលុយចំនួន ២០០០រៀល (ពីរពាន់រៀល) ដើម្បីទៅកាប់អុសក្នុងចម្ការកៅស៊ូ បន្ទាប់មកក៏ជិះម៉ូតូម៉ាក សង់ការ៉េ ពណ៌ក្រហម គ្មានស្លាកលេខ (ម៉ូតូចាស់) និងកាំបិតផ្គាក់ ជិះចេញមកតែម្នាក់ឯង លុះដល់វេលាម៉ោង ១២ថ្ងៃត្រង់ ក៏មានកម្មករជៀរជ័រកៅស៊ូ ប្រទះឃើញមានសាកសព ដែលត្រូវដុតឆេះស្លាប់ជាមួយនឹងម៉ូតូ។
ពេលកម្លាំងជំនាញចុះមកធ្វើការស្រាវជ្រាវ បានឃើញមានស្រាបៀរកម្ពុជាចំនួន ៣កំប៉ុង ប្រអប់ស្នោរចំនួន១ ហើយក្រៅពីនោះពុំមានអ្វីគួរកត់សម្គាល់ទេ ដោយករណីនេះសមត្ថកិច្ចជំនាញកំពុងស្រាវជ្រាវតាមនីតិវិធី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។