ម៉ូតូកង់បីដឹកលោកទៅបិណ្ឌបាត្រគាំងប៉ាដាង ជ្រុលទៅបុកជាមួយរថយន្តដឹកដី ស្លាប់ម្នាក់ របួសព្រះសង្ឃ៥អង្គ
កោះកុង ៖ អ្នកបើកបរម៉ូតូកង់បីម្នាក់បានស្លាប់ភ្លាមៗនៅនិងកន្លែងកើតហេតុ រួមទាំងព្រះសង្ឃ៥អង្គបានរងរបួសធ្ងន់ នៅក្នុងហេតុការណ៍គ្រោះថ្នាក់ចរាចរណ៍រវាងរថយន្តបែនដឹកដី ជាមួយនឹងរ៉ឺម៉កម៉ូតូដឹកព្រះសង្ឃទៅបិណ្ឌបាត្រ កាលពីវេលាម៉ោងប្រមាណ៩ព្រឹក ថ្ងៃទី៣០ ខែមិថុនា ឆ្នាំ២០១៩ ត្រង់ចំណុច លូកម្ពុជា ចន្លោះគីឡូម៉ែត្រលេខ១៤៨ -១៤៩ ក្នុងភូមិអូជ្រៅ ឃុំបឹងព្រាវ ស្រុកស្រែអំបិល។
សមត្ថកិច្ចបានឲ្យដឹងថា មូលហេតុដែលបង្កឲ្យកើតមានឧបទ្វវហេតុគ្រោះថ្នាក់ខាងលើ គឺបណ្តាលមកពីម៉ូតូរ៉ឺម៉កកង់បីគាំងប៉ាដាងទើបធ្វើឲ្យរេចង្កូតចូលទៅខាងរថយន្តដឹកដី ម៉ាកនីសាន់ ព័ណស ចង្កូតស្តាំ ពាក់ស្លាកលេខចង្កូតស្តាំ KPS-1168 បណ្តាលឲ្យអ្នកបើកបរម៉ូតូកង់បីឈ្មោះ ពេជ្រ ភេទប្រុស អាយុ២១ឆ្នាំ មានមុខរបរជាកូនសិស្សលោក រស់នៅភូមិមនោរម្យ ឃុំតាណៃ ស្រុកព្រៃនប់ ខេត្តព្រះសីហនុ ស្លាប់និងកន្លែងភ្លាមៗ រួមទាំងអ្នករួមដំណើរជាព្រះសង្ឃចំនួន៥អង្គដែលគង់នៅវត្តមនោរម្យ បានរងរបួសធ្ងន់ ។
សមត្ថកិច្ចបន្តថា ក្រោយកើតហេតុសមត្ថកិច្ចបានចុះទៅជួយអន្តរាគមន៍បញ្ជូនជនរងគ្រោះទៅកាន់មន្ទីរពេទ្យបង្អែកស្រុកស្រែអំបិល និងប្រគល់សាកសពជនរងគ្រោះដែលបានស្លាប់ទៅឲ្យក្រុមគ្រួសារដើម្បីយកទៅធ្វើបុណ្យតាមប្រពៃណី ចំណែកវត្ថុតាងរថយន្តនិងម៉ូតូកង់បីត្រូវបានកម្លាំងនគរបាលប៉ុស្តិបឹងព្រាវ យកទៅរក្សាទុកនៅអធិការដ្ឋាននគរបាលស្រុកស្រែអំបិល រងចាំការដោះស្រាយ។
សូមបញ្ជាក់ថា ចំពោះអ្នកបើកបររថយន្តខាងលើ សមត្ថកិច្ចនៅពុំទាន់អាចបញ្ជាក់អត្តសញ្ញាណបាននៅឡើយទេ ដោយសារតែគាត់បានរត់គេចខ្លួនបាត់ ហើយពេលនេះកម្លាំងសមត្ថកិច្ចកំពុងតាមស្វែងរក និងស្រាវជ្រាវបន្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។